Xitay hökümiti, dalay lamaning yéqin kelgüside tibetke qaytish mumkinchiliki barliqini chetke qaqti

Xitaylar bilen tibetler otturisida mexpiy söhbet élip bérilghan shundaqla dalay lama tughulghanliqinishng 70 yilliqi xatirliniwatqan bir chaghda, xitay hökümiti seyshenbe küni bayanat élan qilip, dalay lamaning yéqin kelgüside tibetke qaytish mumkinchilikining bishariti yoqliqini bildürdi.

Xitay tashqi ishlar ministiri lyu jyenchaw, dalay lamagha qoyulghan shertlerde özgirish bolmighanliqini eskertip, " u tibet bilen teywenni jonggoning bir qisimi, dep étirap qilghandila, merkizi hökümet uning kélechigi toghrisida söhbet ötküzidu," dédi. Shu küni daramsaladiki tibet sergerdan hökümitining bash ministiri sangdom rénpochi, dalay lamaning hayat chéghida tibetke qaytish mumkinchiliki bar, dep tekitligen.

Dalay lama charshenbe küni 70 yashqa kiridu. Xitay hökümiti 6 - ayning 30 we 7 - ayning 1 - künliri dalay lamaning wekilliri bilen shiwitsariyide mexpiy söhbet ötküzgen.

Lyu jyenchaw, söhbetning tepsilati heqqide toxtalmidi. Emma u, " yéqinda merkizi hökümettiki alaqidar da'iriler dalay lamagha yéqin kishilerni öz ichige alghan bezi tibetlikler bilen uchriship, ularning ümid we teleplirini anglidi," dep körsetti.

Xitay wekiller ömikige merkizi birliksep bölümining mu'awin mudiri ju wéychün yitekchilik qilghan. Tibet terepke dalay lamaning amérikida turushluq wekili lodi gyari yitekchilik qildi. (Erkin)