Dalay lama wekili xitay emeldarliri bilen 5‏-qétimliq söhbetni bashlidi

Tibetlerning sürgündiki diniy dahisi dalay lamaning elchiliri charshenbe küni xitay emeldarliri bilen 5‏-qétimliq söhbetni bashlidi. Emma söhbet yépiq yighin sheklide élip bérilghachqa, söhbet mezmunliri sirtqa ashkarilanmidi.

Roytérs agéntliqining xewer qilishiche, tibetlerning sürgündiki hökümitining bayanatchisi tubtén sampél " bizning ümidimiz, tibet mesilisini xitay emeldarliri bilen söhbet arqiliq hel qilish we shu arqiliq tibet xelqini özi üchün némining hemmidin muhimliqini özi belgilesh hoquqigha érishishtürüsh" deydu.

2002‏- Yilidin hazirghiche dalay lama wekili bilen xitay emeldarliri 4 qétim söhbet ötküzüp bolghan bolsimu, lékin héchqandaq konkrét netije hasil qilalmidi. Tibet hökümitining bayanatchisi ularning 2005 ‏- yili shiwitsariyide xitay emeldarliri bilen ötküzgen bir nechche qétimliq söhbitining nahayiti " semimiy" élip bérilghanliqini we buning tibetliklerge ümid élip kélidighanliqini bildürdi.

Emma xitay da'iriliri tibet wekilliri bilen élip barghan söhbetlirige soghuq mu'amile qilip, bu heqtimu héchqandaq tüzük melumat bermey keldi. Shundaqla xitay yene, tibet wekillirining xitaydiki ziyaritini peqet shexsiy namdiki ziyaret depla chüshendürdi.

Emma bu söhbet échiliwatqan mezgilde, dalay lamaning isra'iliyini ziyaret qilishi, xitay hökümitining qarshiliqini qozghidi hemde xitay da'iriliri isra'iliyige ochuq naraziliq bildürdi. (Peride)