Америкидики тибәтликләр чиңхәй-тибәт төмүр йолиға қарши намайиш қилмақчи

Хитайниң зор мәбләғ билән селиватқан чиңхәй-тибәт төмүр йол қурулуши бу йил 1‏-ийол күни пүтүнләй тамамлинидиған болуп, бу мунасивәт билән америкиниң чикако шәһиридики тибәтликләр вә тибәт һәрикитини қоллиғучилар бу күндә чикакодики хитай консолханиси алдида мәзкур төмүр йол қурулушиға қарши намайиш қилишни пиланлимақта.

Чиңхәй-тибәт төмүр йоли тибәтликләр тәрипидин техиму көп хитай көчмәнлириниң тибәт елиға келишигә түрткә болиду дәп әйиблинип кәлди. Тибәт ишлири мутәхәссиси мәсю акестер хитай һөкүмитиниң бу төмүр йолини мәқсәтлик салғанлиқини ейтип," хитай тибәтни қамал қилишта ички моңғул билән шинҗаңдикидәк нәтиҗә қазиналмиди. Чүнки хитай ички моңғул билән шинҗаңға төмүр йолларни селип, шу арқилиқ бу районларға ғәлибилик һалда көплигән хитай көчмәнлирини йөткиди" дәйду.

Тибәтләрниң сүргүндики диний даһиси далай лама тибәтликләрниң бир мәзгил тақәт қилип хитайниң бу төмүр йолиниң тибәт үчүн қандақ мәнпәәт йәткүзүшини көзитишини тәләп қилди.

Хитайниң бу чиңхәй-тибәт төмүр йоли қурулуши 2001‏- йили башланған болуп, омумий узунлиқи 2000 километир әтрапида келиду. Бу йол арқилиқ бейҗиңдин ласаға 48 саәт ичидә йетип барғили болидикән. Хитай даирилири йеқинда йәнә, кәлгүси 10 йил ичидә бу төмүр йолни һиндистан чегрисиғичә узартидиғанлиқини мәлум қилди.(Пәридә)