Хитай тибәт мусапирлириға оқ чиқарғанлиқини рәт қилди


2007-11-01
Share

Хитай ташқи ишлар министирлиқи пәйшәнбә күни хитай чегра аманлиқ қисимлириниң непалға қачмақчи болған тибәт мусапирлириға оқ чиқарғанлиқини рәт қилди. Чәтәлдики тибәт әркинлики үчүн паалийәт елип баридиған хәлқара тибәт һәрикити тәшкилати чаршәнбә күни хитай чегра аманлиқ қисимлири 10 ‏- айниң 13 ‏- күни непалға қачмақчи болған 30 дәк тибәт мусапириға оқ чиқарғанлиқини, лекин мусапирлар ичидә яриланғанларниң йоқлуқини илгири сүргән иди.

Хәлқара тибәт һәрикитиниң әскәртишичә, непалға қачқан тибәт мусапирлар раһип, раһибә вә балиларни асас қилған болуп, улар непалға саламәт йетип барған болсиму, лекин улар билән биллә қачқан мусапирлардин 7 адәм хитай чегра мудапиә қисимлириниң қолиға чүшүп қалған. Бирләшмә ахбарат агентлиқиниң әскәртишичә, хитай ташқи ишлар министирлиқи баянатчиси лю җйәнчав пәйшәнбә күни хәлқара тибәт һәрикити тәшкилатиниң хәвири "пүтүнләй ялған, һечқачан йүз берип баққан вәқә әмәс," дәп тәкитлигән. Әгәр бу вәқә раст болса, бу хитай чегра мудапиә қисимлириниң непалға қачқан тибәт мусапирлириға оқ чиқириш вәқәсиниң йәнә бир қетим йүз бериши болуп қалиду.

Таққа ямашқучилар 2005 ‏- йили сентәбирдә хитай чегра мудапиә қисимлириниң непалға қачмақчи болған тибәт мусапирлириға оқ чиқирип, бир раһибәни етип өлтүргәнликини синалғуға еливалған. Лекин әйни чағда хитай ташқи ишлар министирлиқи оқ чиқириш вәқәсини рәт қилған болсиму , кейинрәк таққа ямашқучилар еливалған синалғу лентиси чәтәл мәтбуатлирида елан қилинғандин кейин, хитай даирилири вәқәни чегра мудапиә қисимлириниң өзини қоғдаш һәрикити, дәп ақлиған иди. Б д т мусапирлар комитетиниң мәлуматида көрситилишичә, нөвәттә һәр йили тәхминән 2000 дәк тибәт мусапири непалға қечип чиқмақта икән. (Әркин)

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт