Xitay tibet musapirlirigha oq chiqarghanliqini ret qildi

Xitay tashqi ishlar ministirliqi peyshenbe küni xitay chégra amanliq qisimlirining népalgha qachmaqchi bolghan tibet musapirlirigha oq chiqarghanliqini ret qildi. Chet'eldiki tibet erkinliki üchün pa'aliyet élip baridighan xelq'ara tibet herikiti teshkilati charshenbe küni xitay chégra amanliq qisimliri 10 ‏- ayning 13 ‏- küni népalgha qachmaqchi bolghan 30 dek tibet musapirigha oq chiqarghanliqini, lékin musapirlar ichide yarilan'ghanlarning yoqluqini ilgiri sürgen idi.

Xelq'ara tibet herikitining eskertishiche, népalgha qachqan tibet musapirlar rahip, rahibe we balilarni asas qilghan bolup, ular népalgha salamet yétip barghan bolsimu, lékin ular bilen bille qachqan musapirlardin 7 adem xitay chégra mudapi'e qisimlirining qoligha chüshüp qalghan. Birleshme axbarat agéntliqining eskertishiche, xitay tashqi ishlar ministirliqi bayanatchisi lyu jyenchaw peyshenbe küni xelq'ara tibet herikiti teshkilatining xewiri "pütünley yalghan, héchqachan yüz bérip baqqan weqe emes," dep tekitligen. Eger bu weqe rast bolsa, bu xitay chégra mudapi'e qisimlirining népalgha qachqan tibet musapirlirigha oq chiqirish weqesining yene bir qétim yüz bérishi bolup qalidu.

Taqqa yamashquchilar 2005 ‏- yili séntebirde xitay chégra mudapi'e qisimlirining népalgha qachmaqchi bolghan tibet musapirlirigha oq chiqirip, bir rahibeni étip öltürgenlikini sin'alghugha éliwalghan. Lékin eyni chaghda xitay tashqi ishlar ministirliqi oq chiqirish weqesini ret qilghan bolsimu , kéyinrek taqqa yamashquchilar éliwalghan sin'alghu léntisi chet'el metbu'atlirida élan qilin'ghandin kéyin, xitay da'iriliri weqeni chégra mudapi'e qisimlirining özini qoghdash herikiti, dep aqlighan idi. B d t musapirlar komitétining melumatida körsitilishiche, nöwette her yili texminen 2000 dek tibet musapiri népalgha qéchip chiqmaqta iken. (Erkin)