Xitay hökümiti töt neper tibetni solaqqa aldi

Merkizi axbarat agéntliqining béyjingdin uchur tarqitishiche, sichu'en ölkisi genzi oblasti ottura sotida töt neper tibetlikke bölgünchilik,döletni parchilashqa qutratquluq qilish, chet'eldiki bölgünchilerge axbarat bérish jinayetliri bilen 3 yildin 10 yilghiche qamaq jazasi höküm qilin'ghan.

Roytéris agéntliqining bu heqte bergen xewiridin melum bolushiche, bu yil 1 - awghustta genzida ötküzülgen at beygiside " dalay lama tibetke qaytip kelsun" dep sho'ar towlighanliqi üchün qolgha élin'ghan runggé adak isimlik yashmu bu qétim qamaq jazasi bérilgen töt tibet yashning arisida bolup, xitay da'iriliri uninggha sekkiz yilliq qamaq jazasi höküm qilghan.

Runggé adak eyni waqitta qolgha élin'ghan peytte nechche minglighan tibetlikler, xitay hökümet da'iriliridin uning qoyup bérilishini telep qilghanda, saqchilar bilen toqunush peyda bolghan idi.

Xitay hökümiti dalay lamani bölgünchi dep élan qilsimu, tibetlerning uni qollishi barghanche küchiyiwatqan bolup, xitayni endishige salmaqta.

Yaponiyide ziyarette boluwatqan tibet rohani dahisi dalay lama, seyshenbe küni tibet xelqining arzusi buyiche, ömrining axirghiche özining bir iz basarini békitidighanliqini bildürgen. U " eger méning iz basarim xitay hökümiti teripidin békitilgen teqdirde, eger bu iz basarda tibetlikning qelbi bolmisa, u hergizmu tibet xelqi teripidin étirap qilinmaydu dégen". (Gülchéhre)