Үрүмчидә сахта гуваһнамә ясап бейиған бир аққун паш болди

Хитайда һәр қандақ нәрсиниң сахтисини тапқили болидикән , нөвәттә уйғур елидиму той хети, оқуш пүттүрүш депломи, унван кинишкиси, өй мүлүк һоқоқи кинишкиси һәтта ялған нопус қатарлиқ түрлүк гуваһнамиләрниңму сахтисини тапқили болидиған болуп , сахта кинишкә һәм гуваһнамә ясаш һәққидики хитайчә еланлар һәтта кочилардики истолбиларға ашкара чаплап қоюлидикән.

Уйғур елиниң қанунчилиқ гезитидә 14 - авғуст берилгән хәвиридин ашкарилинишичә, үрүмчи шорбулақ районлуқ хәлқ сот мәһкимиси,мушундақ көп хил ялған гуваһнамә ясап сатқан дәй фамилилик бир хитай аққунға икки йиллиқ муддәтлик қамақ җазаси һөкүм қилған.

Дәй хунәндин2005 - йили 9 - айда уйғур елигә иш издәп чиққан аққун болуп , у келә- кәлмәйла тез бейип кәткән. Әсли у адди компютор, нусха көпәйтиш машиниси қатарлиқлар биләнла иҗарә алған өйидә түрлүк сахта кинишкә ясаш завутидин бирни ечивалған икән. У дәсләп херидарларниң тәливигә асасән һәр хил кинишкиләрни ясайдиғанлиқи һәққидә кичик варақчиларни тарқитип бу қанунсиз содисиға киришкән. Кейин йәнә үрүмчидин бир қанчә йәрдә өй иҗарә елип тиҗаритини кеңәйткән.

2006 - Йили 10 - айда у башқилар тәрипидин паш қилинип қолға елинғанда униң икки җайда иҗаригә алған мәшғулат өйидин дөләтлик, аптоном районлуқ маарип тармақлири, қанун тармақлири , сәһийә дохтурхана һәтта җамаәт хәвипсизликиниң тамғилири болуп 1000хилдин артуқ тамға һәмдә ясилип тәйярланған 2500 дин көп сахта гуваһнамә вә кинишкилар чиққан.

Уйғурларниң инкасиға қариғанда , уйғурларниң ишқа орунлишиши кәскин боливатқан бир пәйттә хитай өлкилиридин кәлгән аққунлар мушу хилдики сахта гуваһнамиләр арқилиқ уйғур елидики ихтисас игилири базарлириға суқунуп кирип һәтта яхши хизмәтләргә еришидикән. (Гүлчеһрә)