Uyghur teshkilatliri xitayni térrorizm mesiliside qosh ölchem qollanmaqta, dep eyiblidi

Amérika hökümitining gu'antanamodiki Uyghurlarni xitaygha qayturup bermeydighanliqi muqimlashqan ehwalda, xitay dölet re'isi xu jintaw b d t omumi yighinida söz qilip, térorizimgha qarshi turush urushida qosh ölchem qollinishqa bolmaydighanliqini jakarlighandin kéyin, merkizi gérmaniyidiki dunya Uyghur qurultiyi xitay hökümitini térrorizm mesiliside Uyghurlargha qosh ölchem qollanmaqta, dep eyiblidi.

Dunya Uyghur qurultiyining bayanatchisi dilshat rishit, teywen merkizi axbarat agéntliqigha bergen bayanatida "xitay hökümiti Uyghurlar sadir qilghan shexsi jinayi qilmishlarni térrorizm, dep élan qilip, xitaylar sadir qilghan térrorluq weqelerni jinayi heriket, dep atimaqta," dédi.

Uyghur aptonom rayoni jama'et xewpsizlik nazariti, düshenbe küni bu yil 8 - ayda toxsu nahiyisining ich'ériq yézisida abdulla qurban yétekchilikidiki atalmish bir térorchilar guruhini tarmar qilghanliqini élan qildi. Bu xewerni ilgiri aptonom rayon partkomining sékritari wang léchü'en béyjingda ötküzgen muxbirlarni kütüwélish yighinida tilgha alghan idi.

Dilshat rishitning tekitlishiche, xitay hökümitining Uyghurlar ichidiki shexsi jinayi qilmishlarni térrorizm, dep élan qilishidiki meqsidi, xelq'aragha junggoni térrorizmning qurbani, dep körsitish üchün iken. Xitay hökümiti sherqiy türkistan küchlirini yéqinqi 10 yilda 166 puqrani öltürüsh bilen eyiblimekte. (Erkin)