Хитай даирилири керийә наһийисидә тазилаш елип барди


2006.02.21
Share on WhatsApp
Share on WhatsApp

Төт күн илгири хотән вилайитиниң керийә наһийисидә шәрқий түркистан байриқини наһийә базириға намәлум кишиләр тәрипидин тикләп қоюш вәқәси йүз бәргәндин кейин, хитай даирилири наһийә бойичә кәң көләмлик ахтуруш елип берип, керийә наһийисидики 6 яштин 40 яшқичә болған кишиләрни сорақ қилған.

Дуня уйғур қурултийи баянатчиси дилшат ришитниң әскәртишичә, бүгүн ахтуруш вә сүрүштүрүш һәрикитиниң 4 - күни икән. Дилшат ришит, йәр асти диний мәктәпләргә қатнишиш еһтимали бар, дәп қаралғанлар, тәнтәрбийә мәшиқи билән шуғуллинидиғанлар, түрмидин қоюп берилгән сабиқ мәһбуслар сүрүштуруш обйектиға айланғанлиқини билдүрди.

Хитай даирилири шәрқий түркистан байриқини һизбул тәқрир партийисиниң әзалири тикләп қойған болуши мумкин, дәп гуман қилмақта икән.

Дуня уйғур қурултийи баянатчисиниң әскәртишичә, ахтуруш вә сүрүштуруш һәрикити шу җайдики дөләт бихәтәрлик идариси, җамаәт хәвпсизлик даирилири вә наһийилик иттипақ комитетиниң һәмкарлиқида елип берилмақта.

Дилшат ришит, иттипақ комитетиниң "уйғур аптоном райони" да тунҗи қетим бу хил вәқәләргә сәпәрвәр қилиниши, дәп көрсәтти. Дуня уйғур қурултийи баянатчисиниң әскәртишичә, һазирға қәдәр наһийә бойичә 6 киши қолға елинған. Әмма бу санниң тоғрилиқи вә ахтуруш һәрикитиниң шәрқий түркистан байриқини тикләш вәқәси билән мунасивәтлик яки әмәсликини даириләр тәрипидин айдиңлаштурғили болмиди.

Уйғур аптоном райониниң рәиси исмайил тиливалди өткән 2006 - йили 12- айда "миллий бөлгүнчиләр" гә қарши күрәшниң интайин кәскин елип берилидиғанлиқини җакарлиған. Хитай һөкүмити шәрқий түркистан күчлирини "террорчилар" дәп елан қилған болсиму, әмма хәлқара кишилик һоқуқ органлири хитай даирилирини террорчилиққа қарши турушни баһанә қилип, уйғурларниң кишилик һоқуқини дәпсәндә қилмақта, дәп әйиблигән. (Әркин)

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.