Әзәрбәйҗанда түркий дөләтлириниң қериндашлиқ қурултийи чақирилди
2007.11.18
Әзәрбәйҗанниң пайтәхти баку шәһиридә түркий дөләтлири вә җәмийәтлириниң 11-қетимлиқ достлуқ, қериндашлиқ вә һәмкарлиқ қурултийи чақирилди. Мәзкур қурултайға әзәрбәйҗан президенти илһам әлийев саһибханлиқ қилған болуп, буниңға йәнә түркийә баш министири рәҗәп тайип әрдоған вә сабиқ түркийә президенти сулайман дәмирәл қатарлиқ һәр қайси түрк дөләтлириниң юқири дәриҗилик рәһбәрлири иштирак қилип сөз қилған.
Әзәрбәйҗанниң миллий агентлиқи "дай-аз"ниң хәвәр қилишичә, бу йиғинға түркийә, әзәрбәйҗан, қазақистан, қирғизистан, өзбекистан, түркмәнистан қатарлиқ түркий мустәқил җумһурийәтлири вәкиллиридин башқа русийә тәвәсидики татаристан, башқуртистан, чувашийә, дағистан, қабардино-балқарийә, қарачай-черкәс, алтай, хакасийә қатарлиқ түркий җумһурийәтләрниң вәкиллирини өз ичигә алған дунядики 30 дөләттин кәлгән, 550 нәпәр вәкил иштирак қилған.
Бу қурултайға уйғур вәкиллириму иштирак қилип, уйғурларниң нөвәттики вәзийити һәққидә мәлумат бәргән.
Қурултайниң мәқсити түркий дөләтләр һәм хәлқләр арисидики мунасивәтләрни раваҗландуруш, түркий хәлқләр мәдәнийитини тәшвиқ қилиш, мәдәнийәт алақилирини күчәйтиш, иқтисадий мунасивәтләрни кеңәйтип, түрк дунясиниң мәсилилирини һәл қилиш йоллирини тепиштин ибарәттур.
Қурултайда йәнә әрмән-әзәрбәйҗан, тағлиқ қара бағ тоқунуши, ирақ вә афғанистандики түркий тиллиқ аһалилар мәсилиси вә башқа түрк дунясиға мунасивәтлик бир қатар район характерлиқ мәсилиләр музакирә қилинған.
Әзәрбәйҗан "дай-аз" агентлиқиниң учурида ейтилишичә, түркийә баш министири рәҗәп тайип әрдоған " түркий тиллиқ мәмликәтлири дөләт башлиқлириниң даимий секретарияти" қурушни тәшәббус қилған. Тайип әрдоған өткән қетимқи қурултайда қазақистан президенти нурсултан назарбайевниң түркий хәлқләрниң парламентлири вә зиялийлири бирләшмиси қуруш идийисини тәшәббус қилғанлиқи, нөвәттә бу тәклипләрниң әмәлийләштүриливатқанлиқини әскәрткән.
" Буларниң һәммиси бизниң қолимизда, мән ишинимәнки, буларни әмәлийләштүрүштә бизләрниң күчимиз бар,ишинимәнки, бизниң кәлгүсидики һәмкарлиқлиримиз вә қериндашлиқимиз техиму мустәһкәм болиду, әгәр биз буларни қилалмисақ биз кәлгүси әвладлиримиз алдида гунаһкар болимиз" дәйду түркийә баш министири рәҗәп тайип әрдоған қурултайда. (Үмидвар)
Мунасивәтлик мақалилар
- Оттура асия дөләтлири террорға қарши күрәштин пайдилинип өктичиләрни бастурмаслиқи керәк
- Мәркизи асия иқтисади һәмкарлиқ гәвдисигә әза дөләтләрниң баш министирлири дүшәнбидә учрашти
- Шаңхәй һәмкарлиқ тәшкилати баш министирлири пүтүшти
- Хитай : оттура асия башлиқлар йиғини "бөлгүнчилик" вә енергийә мәсилисини музакирә қилиду
- Түркийә армийиси курдларға зәрбә беришни башлиди
- Өзбекистан -русийә бихәтәрлик даирилири давамлиқ пүтүшти
- Хитай оттура асияда асаслиқ ролчи сүпитидә мәйданға кәлмәктә
- Назарбайеф мәркизий асия дөләтлири иттипақи қурушни йәнә тәшәббус қилди
- Русийә, нәзәрбайифниң оттура асия иқтсадий иттипақи пиланиға соғақ муамилә қилди
- Америка дөләт мәҗлисидә шаңхәй һәмкарлиқ тәшкилати һәққидәгувалиқ йиғини ечилди