Rabiye qadir, amérika memliketlik démokratiyini ilgiri sürüsh jem'iyitide söz qildi

Rabiye qadir xanim amérika memliketlik démokratiyini ilgiri sürüsh jem'iyitide. RFA

Xitay hökümiti teripidin üch hepte ilgiri tuyuqsiz qoyup bérilgen meshhur Uyghur kishilik hoquqperwer zat rabiye qadir, jüme küni merkizi washin'gtondiki amérika memliketlik démokratiyini ilgiri sürüsh fondi jem'iyitide söz qilip, xelq'ara jem'iyetni Uyghurlarning depsende qiliniwatqan kishilik hoquqini özgertish yolida, béyjing hökümitige qarshi awazini yükseltishke chaqirdi.

Yawropa ittipaqini xitaygha qoyghan qoral - yaraq imbargosini bikar qilish tirishchanliqidin waz kéchishke chaqirghan rabiye qadir, " xitay hökümitining yawropa ittipaqidin sétiwalghan qorallarni Uyghurlarning tinch yollar bilen élip barghan heqqaniy heriketlirini basturush üchün ishlitidighanliqi muqerrer," dep körsetti. U mundaq deydu:

"Men bu mesilide yawropa parlaméntiki zatlar bilen alaqilishishim mumkin. Men adettiki ayal bolush süpitim bilen, yawropa komitéti shundaqla yawropa parlaméntida, imbargoni bikar qilishning béyjing da'irilirige qandaq signal béridighanliqini chüshüneleydighan intayin eqilliq siyasetchilerning barliqigha ishinimen."

Jüme künki uchrishish rabiye qadirni kütüwélish munasiwiti bilen démokratiyini ilgiri sürüsh fondi jem'iyitining washin'gtondiki ishxanisida ötküzüldi. Rabiye qadir bu yerde özining türmige kirishtin ilgiriki we türmidiki kechürmishlirini, Uyghurlarning kishilik hoquq weziyitini shundaqla buningdin kéyin qilidighan ishlirini sözlidi.

Rabiye qadir, " yéqinda yüz bergen qirghizistandiki démokratik özgürüshlerning qirghizlar bilen tughqan millet - Uyghurlarning idiye jehettiki oyghunushini ilgiri sürüshi muqerrer, dep körsetti. Amma u, " nöwettiki weziyet astida qirghizistandikige oxshash özgirish Uyghur aptonom rayonida yüz béridu," dep qarimaydighanliqini eskertti.

Bu qétimqi yighinni démokratiyini ilgiri sürüsh fondi jem'iyiti bilen amérika Uyghur jem'iyiti birlikte uyushturghan. (Erkin)