Хитай һөкүмити тйәнәнмин вәқәсидә өлгәнләрниң санини ашкарилашни рәт қилди


2005.06.06

Хитай һөкүмити дүшәнбә күни баянат елан қилип, америка һөкүмитиниң 4 - июн тйәнәнмин вәқәсидә өлгәнләрниң ениқ санини ашкарилаш һәққидики тәлипини рәт қилди.

Франсийә ахбарат агентлиқиниң хәвиригә қариғанда, хитай ташқи ишлар министирлиқиниң баянатчиси куң чүән америкини хитайниң дөләт ишиға арилашмаслиқ һәққидә агаһландурған. У йәнә америка "өзидики кишилик һоқуқ мәсилисигә көпрәк көңүл бөлүши керәк" дәп билдүргән.

Өткән шәнбә күни, америка ташқи ишлар министирлиқи 4 - июн вәқәсиниң 16 йиллиқ хатириси мунасивити билән баянат елан қилип, хитайни тйәнәнмин демократик һәрикитигә қайта баһа беришкә чақирған. Америка йәнә, хитай һөкүмитидин әйни вақиттики бастурушта өлтүргән, яриланған, йоқалған һәмдә вәқә сәвәбидин түрмидә йетиватқан кишиләрниң ениқ санини ашкарилашни тәләп қилған иди.

1989 - Йилидики тйәнәнмин оқуғучилар һәрикитигә қатнашқан нурғун демократик затлар, әйни вақитта, хитай һөкүмитиниң танкиларни ишқа селип, йүзлигән, миңлиған кишиләрни наһәқ өлтүргәнликини билдүргән иди.

Бирақ, хитай һөкүмити болса буни рәт қилип, 4 - июн вәқәсини бастурушниң хитайниң җәмийәт муқимлиқини сақлашта зөрүр икәнликини билдүрүп, әйни вақиттики бастуруш қарариниң тоғра икәнликини көрсәткән. (Арзу)

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.