Amérikining süriye elchixanisi hujumgha uchridi

Amérikining süriyide turushluq elchixanisi seyshenbe küni bir qanche neper qoralliq unsurning hujumigha uchridi. Qoralliq unsurlarning 3 nepiri süriye amanliq xadimliri teripidin étip tashlan'ghan, biri kishi yarilan'ghandin kéyin esirge élin'ghan bolsimu, lékin amérika elchixanisi xadimliri ichide ölgen yaki yarilan'ghanlar bolmidi.

Qoralliq unsurlar amérika elchixanisigha aptomatik qorallar we granatlar bilen hujum qilghan bolsimu, lékin elchixana qorusigha kirelmigen. Elchixanini qoghdawatqan süriye amanliq xadimliridin az dégende bir adem ölgen, puqralarni hésablighanda 11 adem yarilan'ghan bolushi mumkin. Weqede amérika elchixanisigha qoshna qoradiki xitay elchixanisining bir diplomatik xadimi yarilandi. U, eyni chaghda xitay elchixanisining ögziside turup weqeni közitiwatqan iken.

Weqeni öz közi bilen körgüchiler, qoralliq unsurlarning elchixanigha hujum qilghanda " allahu - ekber" dep waqirighanliqini bildürgen. Bu weqe süriye - amérika munasiwiti jenubiy liwandiki hizbulla - isra'iliye toqunushi sewebidin jiddiyliship ketken ehwalda yüz berdi. (Erkin)