Вейтнам баш министири 30 йилдин буян түнҗи қетим америкини зиярәт қилмақчи

Вейтнам баш министири фән винкәй өзиниң киләр айда америкини зиярәт қилишни пиланлаватқанлиқини билдүрди. Бу, вейтнам уруши ахирлашқан 30 йилдин буян, вейтнам рәһбириниң түнҗи қетим америкини зиярәт қилиши болуп һесаблиниду.

Фән винкәй бу пиланини пәйшәнбә күни авистиралийини зиярәт қилған мәзгилидә ашкарилиди. Ройтирс агентлиқиниң хәвиригә қариғанда,у кәлгүси зияритиниң америка билән болған һәр тәрәплимә мунасивити вә һәмкарлиқини күчәйтишни мәқсәт қилидиғанлиқини билдүргән. Әмма у зияритиниң америка билән бирлишип, хитайниң шәрқий асия раюнидики тәсир даирисиниң кеңийишини чәкләш истратегийисиниң бир қисми әмәсликини тәкитлигән.

Хитай һөкүмити вейтнам урушида, вейтнам компартийисини бар күчи билән қоллиған болуп, уруш ахирлашқандин кейин, америка вә вейтнамниң мунасивитиниң яхшилиниши билән, хитай - вейтнам мунасивитидә зил өзгиришләр болған. Икки дөләт кейинчә һәтта қисқа вақит тоқунушқан иди.

Гәрчә йеқинқи йиллардин буян бейҗиң билән ханойниң мунасивити яхшиланған болсиму, бирақ күзәткүчиләр икки тәрәпниң йәнила бир- биригә иһтиятчан муамилә қиливатқанлиқини билдүрмәктә.

Хәвәргә қариғанда, америка билән вейтнам 10 йил аввал дипломатик мунасивитини рәсмий әслигә кәлтүргәндин буян, дипломатик вә сода алақисини барғансири күчәйтмәктә. (Арзу)