Wéytnam bash ministiri 30 yildin buyan tünji qétim amérikini ziyaret qilmaqchi

Wéytnam bash ministiri fen winkey özining kiler ayda amérikini ziyaret qilishni pilanlawatqanliqini bildürdi. Bu, wéytnam urushi axirlashqan 30 yildin buyan, wéytnam rehbirining tünji qétim amérikini ziyaret qilishi bolup hésablinidu.

Fen winkey bu pilanini peyshenbe küni awistiraliyini ziyaret qilghan mezgilide ashkarilidi. Roytirs agéntliqining xewirige qarighanda,u kelgüsi ziyaritining amérika bilen bolghan her tereplime munasiwiti we hemkarliqini kücheytishni meqset qilidighanliqini bildürgen. Emma u ziyaritining amérika bilen birliship, xitayning sherqiy asiya rayunidiki tesir da'irisining kéngiyishini cheklesh istratégiyisining bir qismi emeslikini tekitligen.

Xitay hökümiti wéytnam urushida, wéytnam kompartiyisini bar küchi bilen qollighan bolup, urush axirlashqandin kéyin, amérika we wéytnamning munasiwitining yaxshilinishi bilen, xitay - wéytnam munasiwitide zil özgirishler bolghan. Ikki dölet kéyinche hetta qisqa waqit toqunushqan idi.

Gerche yéqinqi yillardin buyan béyjing bilen xanoyning munasiwiti yaxshilan'ghan bolsimu, biraq küzetküchiler ikki terepning yenila bir- birige ihtiyatchan mu'amile qiliwatqanliqini bildürmekte.

Xewerge qarighanda, amérika bilen wéytnam 10 yil awwal diplomatik munasiwitini resmiy eslige keltürgendin buyan, diplomatik we soda alaqisini barghansiri kücheytmekte. (Arzu)