Kommunizimning ziyankeshlikige uchrighan kishilerni xatirilesh abidisi washin'gtonda tiklendi

6 ‏- Ayning 12 ‏- küni amérikining paytexti washin'gton shehiride kommunizimning ziyankeshlikige uchrighan kishilerni xatirilesh abidisi tiklendi. Abide tiklesh murasimigha amérika prézidénti jorj bush özi riyasetchilik qildi.

Amérika dölet mejlisi binasigha yéqin jayda qed kötürgen bu abide 1989 ‏- yili béyjingdiki tyen'enmén meydanida oqughuchilar layihiligen erkinlik ilahi heykilining teqlid nusxisidur.

Amérika prézidénti jorj bush kommunizimning ziyankeshlikige uchrighan kishilerni xatirilesh abidisini tiklesh murasimida qilghan sözide "dunya hazir kommunizimning ziyankeshlikige uchrighan az sandiki kishilernila bilidu", "kommunizm sowét ittipaqida, xitayda we dunyaning bashqa jaylirida ziyankeshlik qilghan adem sani yüz milyondin ashidu", "kommunist partiye hakimiyiti kishilerning hayatigha ziyankeshlik qilghandin kéyin yene, kishilerning ghurur-iptixarini we paji'e toghrisidiki es -xatirisini yoq qiliwétishqa urunup kelmekte", "bügün washin'gtonda tiklen'gen bu abide kishilerning ghurur -iptixarini, es -xatirisini eslige keltürüsh, ziyankeshlikke uchrighan kishilerni estin chiqarmasliq rolini oynaydu", "kommunizm we térrorchilar choqum meghlup bolidu " dédi.

Merkizi agéntliqining xewer qilishiche, xitay tashqi ishlar ministirliqining bayanatchisi chin'gang "biz amérika terepning söz -heriketlirige qattiq naraziliq bildürimiz we qarshi turimiz" dégen .(Weli)