Xitay prézidént bushning abide tiklesh murasimida qilghan sözlirige naraziliq bildürdi

Xitay da'iriliri peyshenbe küni, amérika prézidénti jorj bushning washin'gtonda ötküzülgen abide tiklesh murasimida qilghan sözlirige qattiq naraziliq bildürdi.

Amérika prézidénti bush 6 ‏- ayning 12 ‏- küni washin'gtonda kommunizimning ziyankeshlikige uchrighan kishilerni xatirilesh munasiwiti bilen élip bérilghan abide tiklesh murasimida söz qilip : " kommunizimning, sowit ittipaqida, xitayda we dunyaning bashqa jaylirida ziyankeshlik qilghan adem sani yüz milyondin ashidu" dep körsitip : " bügün, washin'gtonda tiklen'gen bu abide kishilerning ghurur ‏- iptixarini, paji'eler heqqidiki eslime xatirisini eslige keltürüsh, ziyankeshlikke uchrighan kishilerni untup qalmasliq rolini oynaydu, kommunizm we térrorchilar choqum meghlup bolidu" dégen idi.

Xitay terep, amérika prézidénti jorj bushning " kommunizimning ziyankeshlikige uchrighan kishilerni xatirilesh abidisini tiklesh murasimigha qatnishishi, soghuqchiliq urushi idiyisi bilen idé'ologiye qarimu - qarshiliqini peyda qilishtin ibaret" dédi.

Kommunizimning ziyankeshlikige uchrighan kishilerni xatirilesh abidisi, 1989 ‏- yili béyjingdiki tyen'enmin meydanida oqughuchilar layihiligen " erkinlik ilahi" heykilining teqlidi bolup, xitay hökümiti " 4‏ - iyun weqesi" ni xatirileshni izchil türde qattiq cheklep kelmekte. (Eqide)