12- ئىيۇن كۈنى ئافغانىستاننىڭ كەلەنگەر رايونىدا نامەلۇم كىشىلەر، قىز ئوقۇغۇچىلارغا ھۇجۇم قىلىپ، ئىككى كىچىك باشلانغۇچ مەكتەپ ئوقۇغۇچىسى قىزىنى ئۆلتۈرگەن. ھۇجۇمدا ئۈچ قىز ئوقۇغۇچى يارىلانغان.
ئافغانىستان خەۋەر ئاگېنتلىقىنىڭ مەلۇم قىلىشىچە، ھۇجۇمدا ئۆلگەن ئىككى كىچىك قىز، قەلەي سەيد ھەبىبۇللا باشلانغۇچ مەكتىپىنىڭ بىرىنچى ۋە ئىككى سىنىپ ئوقۇغۇچىلىرى ئىكەن.
ئافغانىستان ساقچى دائىرىلىرى بۇ ھۇجۇمنىڭ تالىبان قالدۇقلىرى تەرىپىدىن ئېلىپ بېرىلغانلىقىنى بىلدۈردى. لېكىن، تالىبانلارنىڭ باياناتچىسى، قىز ئوقۇغۇچىلارغا ھۇجۇم قىلغانلارنى قاتتىق ئەيىبلەپ، تالىبانلارنىڭ بۇ ھۇجۇمدا ھېچقانداق مەسئۇلىيىتى يوقلىقىنى تەكىتلىدى.
لېكىن، كۆپچىلىككە مەلۇم بولغاندەك، ئافغانىستاندا تالىبانلار ھاكىمىيىتى دەۋرىدە، قىزلارنىڭ مەكتەپكە بېرىشى ۋە ئاياللارنىڭ ئىدارە-جەمئىيەتلەردە ئىشلىشى چەكلەنگەن بولۇپ، ئافغانىستاندىكى پۈتۈن قىزلار مەكتىپى تاقالغان. ھەتتا ئاياللارنىڭ يالغۇز سىرتقا چىقىشىمۇ چەكلەنگەن ئىدى. (ئۆمەر قانات)