Кабулдики өзини өлтүрүвелиш характерлик һуҗумда 1 америка әскири вә 5 афған пуқраси өлди


2007.10.06

Шәнбә күни афғанистанниң пайтәхти кабул шәһиридә, америкиниң бир һәрбий әтритигә қарши елип берилған өзини өлтүрүвелиш характерлик һуҗумда, бир америка әскири вә 5 афған пуқраси өлгән. Һуҗумда нурғунлиған киши яриланған.

Хәвәрләргә қариғанда, бу һуҗум, өткән сәккиз күн ичидә кабул шәһиридә елип берилған үчүнчи өзини өлтүрүвелиш характерлик һуҗум һесаблинидикән.

Бу арида афғанистанниң шәрқий райониға җайлашқан хост шәһиридә, йолға орунлаштурлған бир бомбиниң партилиши нәтиҗисидә 5 афған сақчиси өлгән.

Өткән йили болупму афғанистанниң җәнубий вә шәрқий җәнубий районлирида афғанистандики иттипақдаш армийә вә афған миллий армийисигә қарши елип барған һуҗумлирида нурғун қурбан бәргән вә мәғлубийәткә учриған талибан қалдуқлири, бу йил асаслиқ нишанини афғанистанниң пайтәхти кабул вә башқа чоң шәһәрләрдә, өзини өлтүрүвелиш характерлик һуҗумлар елип беришқа қаратқан.

Хәвәрләргә қариғанда, талибан қалдуқлири чоң шәһәрләрдә өзини өлтүрүвелиш характерлик һуҗумлар елип бериш арқилиқ, афғанистан хәлқиғә,афғанистан һөкүмити вә афғанистандики иттипақдаш армийиниң уларниң бихәтәрликигә капаләтлик қилалмайдиғанлиқини испатлашни мәқсәт қилидикән. (Өмәр қанат)

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.