Kabuldiki özini öltürüwélish xaraktérlik hujumda 1 amérika eskiri we 5 afghan puqrasi öldi

Shenbe küni afghanistanning paytexti kabul shehiride, amérikining bir herbiy etritige qarshi élip bérilghan özini öltürüwélish xaraktérlik hujumda, bir amérika eskiri we 5 afghan puqrasi ölgen. Hujumda nurghunlighan kishi yarilan'ghan.

Xewerlerge qarighanda, bu hujum, ötken sekkiz kün ichide kabul shehiride élip bérilghan üchünchi özini öltürüwélish xaraktérlik hujum hésablinidiken.

Bu arida afghanistanning sherqiy rayonigha jaylashqan xost shehiride, yolgha orunlashturlghan bir bombining partilishi netijiside 5 afghan saqchisi ölgen.

Ötken yili bolupmu afghanistanning jenubiy we sherqiy jenubiy rayonlirida afghanistandiki ittipaqdash armiye we afghan milliy armiyisige qarshi élip barghan hujumlirida nurghun qurban bergen we meghlubiyetke uchrighan taliban qalduqliri, bu yil asasliq nishanini afghanistanning paytexti kabul we bashqa chong sheherlerde, özini öltürüwélish xaraktérlik hujumlar élip bérishqa qaratqan.

Xewerlerge qarighanda, taliban qalduqliri chong sheherlerde özini öltürüwélish xaraktérlik hujumlar élip bérish arqiliq, afghanistan xelqighe,afghanistan hökümiti we afghanistandiki ittipaqdash armiyining ularning bixeterlikige kapaletlik qilalmaydighanliqini ispatlashni meqset qilidiken. (Ömer qanat)