Америка армийиси афғанистанда 80 нәпәр талибан қораллиқ унсурини өлтүрди

Америка һәрбий тәрәпниң елан қилишичә, америка башчилиқидики бирләшмә армийә шәнбә күни афғанистанниң һелмонд өлкисидә талибанлар билән елип барған бир мәйдан урушта 80 нәпәр талибан җәңчисини өлтүргән.

Б б с агентлиқиниң мунасивәтлик мәнбәләрдин нәқил кәлтүрүп тарқатқан учуриға асасланғанда, гәрчә америка тәрәп бу санни уруштин кейинки тәкшүрүш әһвалиға асасән елан қилған болсиму, лекин техи муқимлаштурулмиған, бирақ, йәрлик учурларға асасланғанда, бу җәңдә 15тин 20 ғичә талибан җәңчиси өлтүрүлгән , әмма бу санниму техичә дәлилләшләргә еришәлмигән. Мәзкур җәң талибан қошунлириниң чарлаш елип бериватқан америка әскәрлиригә туюқсиз һуҗум қозғишидин келип чиққан болуп, икки тәрәп арисида кәскин уруш йүз бәргән һәмдә америка армийисиниң айропиланлири йетип келип җәңгә маслашқан.

Һелмонд өлкиси афғанистанниң оттура җәнубиға тоғра кәлгән болуп, у қәндиһар қатарлиқ җайларға охшаш талибанларниң һәрикәтлири күчлүк нуқтилардин һесаблинидикән. Бирләшмә армийә мәзкур җайларни контрол қилип, талибанларниң қаршилиқлирини үзүл-кесил тазилаш үчүн һәрикәт қилмақта. Бу йил 9-айдин буян мәзкур җайларда америка башлиқ ғәрб қошунлири билән талибанлар арисида һәр хил шәкилдики тоқунушлар йүз берип, 250 дин артуқ талибан җәңчиси өлтүрүлгән.

Өткән йиллардин буян талибанлар афғанистанниң җәнубидики бир қисим җайларда баш көтүрүшкә йүзләнгән болуп, улар нато вә афғанистан һөкүмәт қошунлириға көп қетим һуҗум қозғиған болсиму, ғәлибә қазиналмиди.(Үмидвар)