Afghanistandiki toqunushlarda onlighan taliban militanti öltürüldi

Amérikining yétekchilikidiki birleshme armiye qisimliri teripidin, afghanistanning jenubiy rayonida élip bérilghan bir tazilash herikiti jeryanida, 23 taliban militanti öltürülgen. Birleshme armiye xadimlirining bildürüshiche, hélmend ölkisining grmsir rayonida élip bérilghan heriket jeryanida 11 taliban militanti tirik qolgha chüshürülgen. Birleshme armiye xadimliri, bu tazilash herikitining qachan élip bérilghanliqi heqqide birnéme démigen.

Bu arida franisye agéntliqining xewer qilishiche, birleshme armiye qisimliri teripidin shenbe küni qendehar ölkisining ziray rayonida élip bérilghan bir tazilash herikitide az dégende 10 taliban militanti öltürülgen. Xewerde éytilishiche rayonda toqunushlar téxi dawamlashmaqta.

2001‏- Yili amérikining afghanistan'gha qaratqan herbiy herikiti netijiside afghanistandiki hakimiyiti gumran bolghan talibanlar, yéqinqi yillardin buyan qaytidin teshkillinip, afghanistan milliy armiyisi we afghanistandiki birleshme armiye qisimlirigha qarshi hujumgha atlan'ghan bolup, ötken yili bolupmu afghanistanning jenubiy rayonlirida keng kölemlik hujumlar yolgha qoyghan hemde bezi rayonlarni kontrolliqini qaytidin qolgha alghan idi. Emma bu hujumlar jeryanida qattiq zerbilerge uchrighan taliban militantliri bu yil asasen kichik guruppilar sheklide pa'aliyet élip bérip, iraqtiki qarshilashquchi küchler ishlitiwatqan özini öltürüwélish xaraktérlik hujumlar qatarliq taktikilarni ishlitishke bashlighan. (Ömer qanat)