Афғанистан парламент сайлиминиң беләт ташлаш ишлири ахирлашти


2005.09.18
Share on WhatsApp
Share on WhatsApp

Афғанистанда 30 йилдин буян тунҗи қетим елип берилған парламент сайлиминиң беләт ташлаш ишлири 18 -сентәбир йәкшәнбә күни асасий җәһәттин ахирлишип, көп қисим беләт ташлаш понкитлири тақалди.

Гәрчә сайлам мәзгилидә бир қисим зораванлиқ һәрикәтлири йүз бәргән болсиму, лекин көзәткүчиләр бу қетимлиқ сайламниң асасий җәһәттин оңушлуқ елип берилғанлиқини билдүрмәктә. Униң үстигә хәлқниң сайламға болған қизғинлиқиму интайин юқири болуп, беләт ташлашқа қатнашқан афған хәлқиниң сани12 милйондин ашқан.

30 Йилдин буян тунҗи қетим елип берилған бу парламент сайлимида, афғанистан төвән палатасидики 249 орунға җәмий 2800 нәпәр кандидат өзини көрсәткән. Қалған 3000 кандидат болса, өлкә дәриҗилик кеңәш әзалиқ орнини талишиду.

Әнглийә б б с радио телевизийә ширкитиниң хәвиригә қариғанда, сайлам башлинип узун өтмәй, бирләшкән дөләтләр тәшкилатиниң кабулда турушлуқ ишханиси зәмбирәк һуҗумиға учрап, партлашта тинчлиқ қоғдиғучи қисимдики бир нәпәр франсийилик әскәр қаза қилған.

Афғанистан һөкүмитигә қарши бир қисим қораллиқ күчләр сайламдин бурунму, мәзкур сайламға бузғунчилиқ қилидиғанлиқини билдүргән иди. Афғанистан һөкүмити сайламниң оңушлуқ елип берилиши үчүн бихәтәрлик тәдбирлирини күчәйтип, һәр қайси сайлам понкитлирини қоғдаш үчүн 40 миң әскәр аҗратқан. Шундақла америка билән шималий атлантик әһдә тәшкилатиму бу йәргә 30 миң кишилик қошун орунлаштурған. (Пәридә)

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.