Afghanistan parlamént saylimining bélet tashlash ishliri axirlashti


2005.09.18
Share on WhatsApp
Share on WhatsApp

Afghanistanda 30 yildin buyan tunji qétim élip bérilghan parlamént saylimining bélet tashlash ishliri 18 -séntebir yekshenbe küni asasiy jehettin axirliship, köp qisim bélet tashlash ponkitliri taqaldi.

Gerche saylam mezgilide bir qisim zorawanliq heriketliri yüz bergen bolsimu, lékin közetküchiler bu qétimliq saylamning asasiy jehettin ongushluq élip bérilghanliqini bildürmekte. Uning üstige xelqning saylamgha bolghan qizghinliqimu intayin yuqiri bolup, bélet tashlashqa qatnashqan afghan xelqining sani12 milyondin ashqan.

30 Yildin buyan tunji qétim élip bérilghan bu parlamént saylimida, afghanistan töwen palatasidiki 249 orun'gha jem'iy 2800 neper kandidat özini körsetken. Qalghan 3000 kandidat bolsa, ölke derijilik kéngesh ezaliq ornini talishidu.

En'gliye b b s radi'o téléwiziye shirkitining xewirige qarighanda, saylam bashlinip uzun ötmey, birleshken döletler teshkilatining kabulda turushluq ishxanisi zembirek hujumigha uchrap, partlashta tinchliq qoghdighuchi qisimdiki bir neper fransiyilik esker qaza qilghan.

Afghanistan hökümitige qarshi bir qisim qoralliq küchler saylamdin burunmu, mezkur saylamgha buzghunchiliq qilidighanliqini bildürgen idi. Afghanistan hökümiti saylamning ongushluq élip bérilishi üchün bixeterlik tedbirlirini kücheytip, her qaysi saylam ponkitlirini qoghdash üchün 40 ming esker ajratqan. Shundaqla amérika bilen shimaliy atlantik ehde teshkilatimu bu yerge 30 ming kishilik qoshun orunlashturghan. (Peride)

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.