Afghanistandiki toqunushlarda az dégende 70 taliban militani öldi

• 
  2006-07-17

Amérika bashchiliqidiki birleshme armiyining afghanistanda qaytidin teshkillinip, hetta bezi rayonlarda hakimiyitini qaytidin tikleshke bashlighan taliban qalduqlirigha qaratqan tazilash herikiti dawamlishiwatidu. Yekshenbe küni birleshme armiye qisimliri teripidi élip bérilghan mezkur heriket jeryanida az dégende 70 taliban militani öltürülgen.

Amérika bashchiliqidiki birleshme armiye, talibanlar kontrolliqidiki rayonlarda afghanistan hökümitining hakimiyitini qaytidin tiklimigiche, taliban qalduqlirigha qaratqan herbiy herikitini toxtatmaydighanliqini bildürmekte.

Afghanistandiki taliban qalduqliri bolupmu, ötken may éyidin béri hujumlirini kücheytti. Ular bir tereptin özini öltürüwilish xaraktérlik hujum we bashqa yéngi urush taktikisi hemde usullirini ishlitish arqiliq afghanistandiki birleshme armiye we afghan armiyisige qaratqan hujumlirini köpeytish yene bir tereptin afghanistan yüz bergen bezi weqelerni süsy'istmal qilish, teshwiqat élip bérish we xelqqe tehdit sélish arqiliq, afghanistandiki bolupmu afghanistanning jenubiy rayonliridiki tesiri da'irisini künséri kéngeytishke bashlidi.

Amérika birleshme agéntliqining xewer qilishiche, afghanistanda may iyidin béri yüz bergen toqunushlarda 800‏ din artuq adem ölgen.

Afghanistandiki taliban qalduqlirining, bezi rayonlarda hakimiyetlirini qaytidin tiklesh tesebbusliri, afghanistandiki birleshme armiye we afghan milliy armiyisining, taliban qalduqlirigha qarshi keng kölemlik bir herbiy heriket bashlitishigha seweb bolghan idi.

Bu heriket 2001‏- yili talibanlarning afghanistandiki hakimiyiti amérika qisimliri teripidin gumran qilin'ghandin béri, afghanistanda élip bérilghan eng chong herbiy heriket bolup, bu heriketke az dégende 10000 esker qatnashmaqta. (Qanat)