Afghanistan prézidénti kechürüm qanunini parlaméntgha qayturuwetti

Afghanistan prézidénti hamit kerzey, afghanistan parlaméniti teripidin, ötken 25 yil ichide afghanistanda yüz bergen toqunushlargha qatnashqan pütün kishilerning qilmishlirini kechürüm qilish toghrisida qobul qilin'ghan, kechürüm qanun layihisini, özgertish kirgüzüsh telipi bilen parlaméntigha qaturuwetti.

Mezkur qanun, hökümettiki, parlaménttdiki urush jinayetchilirini, tutush buyruqi chiqrilghan taliban rehberlirining hemde afghan hökümiti we afghanistandiki ittipaqdash armiye qisimlirigha qarshi élip bériliwatqan heriketlerge rehberlik qiliwatqan afghanistanning sabiq bash ministiri gulbuddin hikmetyar qatarliq kishilerning kechürümdin paydilinishi üchün shara'it yaratqan idi.

Afghanistan parlaménit teripidin qobul qilin'ghan bu qanun, gherb döletliri hemde xelq'ara kishilik hoquq teshkilatlirining tenqidige uchrighan. Emma afghansitandiki sabiq mujahit rehberlerning qollughuchiliri ötken ay kabulda keng kölemlik bir namayish ötküzüp, prézidént kerzeydin kechürüm qanunini qobul qilishini telep qilghan.

Kishilik hoquq teshkilatliri, afghanistan hökümitidin, ötken 25 yil ichide afghanistanda yüz bergen toqunushlarda nurghun jinayetler ishligen bolsimu, pursettin paydilinip nöwette, hökümetning her qaysi organlirigha kiriwalghan kishilerni énqlap chiqip ularni jazalashini telep qilmaqta.

Lékin, roytris agéntliqining bildürüshiche, afghanistan parlaméniti ezalirining köpinchisi, sabiq kommunist rehberler, sowit eskerlirige qarshi urushqan burunqi mujahitlar we sabiq taliban rehberliridin teshkil tapqanliqi üchün parlaméntida ularni jazalash toghrisida qanun maqullitish mumkin emes iken. (Qanat)