Afghanistanda 45 puqra hawa hujumi tüpeylidin öldi

Jüme küni afghanistanning jenubidiki hélmond ölkiside amérika we shimaliy atlantik okyan ehdi teshkilati küchlirining talibanlargha qaratqan bir qétimliq keng kölemlik hujumliri netijiside köpligen taliban jengchisi we tinch puqra hayatidin ayrilghan bolup, amérika awazi radi'osining afghanistan hökümet da'irilirining istatistikiliq melumatliridin neqil keltürüshiche, az dégende 65 neper taliban jengchisi we 45 neper tinch puqra bombardimanda öltürülgen.

Lékin, zadi qanchilik puqraning ölgenliki heqqide éniq yekün yoq. Yuqirida éytilghan san afghanistan hökümet da'irilirining tekshürüshi arqiliq otturigha chiqirilghan bolsimu, biraq ret qilinishqa uchrimaqta. Taliban jengchiliri jeng dawamida mehellilerge yoshurunuwalghan bolup, bu ehwal puqralarning bihude ölüp kétishige seweb bolghan.

Perghane agéntliqining uchuridin qarighanda, iyunning axirqi künliri afghanistan bixeterlik da'iriliri uzundin buyan afghanistanda pa'aliyet qiliwatqan özbékistan islam herikiti teshkilatining rehbiri tahir yoldashning yéqin qomandanliridin qari abul qadir bilen qari hékmetullani qolgha chüshürgen.

Nöwette, afghanistandiki taliban qalduqliri, özbékistan islam herikitining ezaliri we bashqa chet memliketlerdin kelgen, özlirini islamiy guruppilar dep atawatqan qoralliq qarshiliq körsetküchler nato , amérika we afghanistan hökümet küchlirining birleshme hujumlirigha duch kelmekte iken. (Ümidwar)