Amérika mudapi'e minstirliki, afghanistan'gha 3200 neper amérika déngiz armiyisining quruqluqta jeng qilghuchi qisimlirini ewetidighanliqini jakarlidi

• Muxbirimiz ömer qanatning bu heqtiki toluq melumati
• Download story audio

Seyshenbe küni, amérika mudapi'e minstirliki, afghanistan'gha 3200 neper amérika déngiz armiyisining quruqluqta jeng qilghuchi qisimlirini ewetidighanliqini jakarlidi. Siyasiy mulahizichilerning bildürüshiche, bu heriket, bir tereptin talibanlarning afghanistandiki pa'aliyetlirini künséri kücheytiwatqanliqini kürsetse, yene bir tereptin, amérika hökümitining térrorchiliqqa qarshi urushta diqqet merkizini qaytidin jenubiy asiya rayonigha qaratqanliqining ipadisi iken.

Afghanistan'gha yene 3200 neper amérika déngiz armiyisining quruqluqta jeng qilghuchi qisimlirining ewetilishi bilen, afghanistandiki amérika herbiy qisimlirining sani 30000 kishige yitidiken. Gerche, afghanistandiki amérika herbiy qisimlirining sani, amérikining iraqtki herbiy qisimlirigha sélishturghanda nahayiti az körünsimu, emma afghanistan'gha qoshumche amérika herbiy qisimlirining ewetilgenliki, afghanistanda mewjut amérika we shimaliy atlantik okyan ehdi teshkilati herbiy küchlirining, taliban qalduqlirining qarshiliq heriketlirini basturalmighanliqining bir ipadisi hésablinidiken.

Afghanistandiki taliban qalduqliri, deslepte afghanistanning jenubiy rayonida bashlatqan qarshiliq heriketlirini nöwette afghanistanning paytexti kabul shehirige kéngeytken bolup, charshenbe küni yeni amérika mudapi'e minsitirliqi afghanistan'gha yene 3200 esker ewetidighanliqini élan qilip bir kündin kéyin, kabul shehiridiki eng chong méhmanxanilarning biri hésablan'ghan we asasen chet'ellikler turidighan, serina méhmanxanisigha qarita élip bérilghan özini öltürüwilish xaraktérlik hujumda, 8 kishi ölgen.

Siyasiy analizchi jéson motlak we jim lobning asiya waqti gézitide élan qilghan maqaliside bildürüshiche, amérika hökümiti, afghanistan'gha ewetilidighan 3200 neper qoshumche amérika qisimlirining talibanlar herikitining basturulushida muhim rol oynaydighanliqini ümid qilmaqta. Shundaqla shimaliy atlantik okyan ehdi teshkilatigha eza döletlerdin afghanistan'gha téximu köp herbiy qisim ewetishini telep qilmaqta.

Lékin xewerlerge qarighanda, afghanistandiki talibanlar herikitige qarshi qandaq bir herbiy istratégiye ishlitish toghrisida, amérika bilen shimaliy atlantik okyan ehdi teshkilatidiki ittipaqdashliri arisida ixtilap mewjut bolup, bu ixtilap charshenbe küni amérikining shimaliy atlantik ehdi teshkilatining bezi qisimlirini partizanliq urushigha qarshi turushni bilmeydu dep eyiblishi we mezkur teshkilatning amérikining bu eyiblishini ret qilishi bilen ashkara otturigha chiqti.

Amérika mudapi'e minstiri, robert géts amérikida chiqidighan los anjilis waqti gézitige bergen bayanatida, shimaliy atlantik okyan ehdi teshkilatining afghanistandiki herbiy heriketlirini tenqid qilip, shimaliy atlantik okyan ehdi teshkilatining bezi qisimliri we herbiy meslihetchiliri herbiy jehettin talibanlargha qarshi turush qabiliyet we'iqtidarigha ige bolmasliqi mumkin dep, körsetken.

Shimaliy atlantik okyan ehdi teshkilatining bash katibi général shéfer, amérika mudapi'e minstirining mezkur teshkilatqa qaratqan tenqidlirini ret qilip, shimaliy atlantik okyan herbiy qisimlirining wezipisini ixlasmenlik bilen ada qiliwatqanliqini tekitligen.

Qandaq bolushidin qet'inezer, afghanistandiki taliban qalduqlirining qarshiliq heriketliri 2002‏- yilidin béri bolupmu, amérika afghanistandiki herbiy heriketlerning mes'ulluqini shimaliy atlantik okyan ehdi teshkilatigha ötküzüp bergendin béri téximu kücheygen.

Talibanlarning qarshiliq heriketlirining küchiyishide, yerlik xelqlerning shimaliy atlantik okyan ehdi teshkilati qisimlirining herbiy heriketlirigha bolghan naraziliqi muhim rol oynighan bolup, shimaliy atlantik okyan ehdi teshkilati herbiy qisimliri teripidin afghanistanning jenubiy rayonlirida élip bérilghan heriketler jeryanida, nurghunlighan bigunah puqralarning ölgenliki, xelqni ghezeplendürgen . Talibanlar bolsa, xelqning bu ghezipidin nahayiti yaxshi paydilan'ghan.

Yuqiridiki ulinishtin, muxbirimiz ömer qanatning bu heqtiki melumatini anglaysiz.