Kondaliza rayis xitay hökümitining sudan'gha darur mesiliside bésim ishlitishni telep qildi

Amérika tashqi ishlar ministiri kondaliza rayis dunya döletliridin bolupmu xitaydin darfur rayonidiki toqunushlarni toxtitish üchün sudan hökümitige bésim ishlitishni telep qildi. Xewerlerge qarighanda, türt yilidin béri sudanning darfur rayonida yüz bergen toqunushlarda 200 mingdin artuq adem ölgen.

Amérika we gherb döletliri darfur mesilisini bir terep qilish üchün suda bilen yéqin munasiwetke ige xitay hökümitining sudan hökümitige bésim ishlitishini telep qilmaqta.

Amérika dölet mejlisining bezi ezaliri hemde xelq'ara kishilik hoquq teshkilatliri xitay hökümitini, darfur rayonidiki qirghinchiliqqa qarimay, sudan bilen soda munasiwetlirini dawamlashturush bolupmu bu dölettin néfit import qilish arqiliq sudan hökümitini qollawatidu, dep eyiblimekte.

Amérika tashqi ishlar ministiri kondaliza rayis jüme küni amérika dölet mejliside qilghan sözide, xitay dölet re'isi xu jintawning yéqinda sudan'gha qaratqan ziyariti jeryanida sudan'gha xelq'ara tinchliqni qoghdash qisimliri orunlashturush toghrisidiki sözliri, xitayning darfur mesiliside siyasitining ilgiriligenlikining bir bishariti hésablinidu, dégen. (Qanat)