Gana afriqa döletlirini xitayning mustemlikisi bolup qalmasliqqa agahlandurdi

Gana tashqi soda ministiri afriqa döletlirini xitayda tawar éksport baziri izdeshke, lékin béyjingning xitay afriqidin peqet xam eshya matériyallirinila sétiwalidighan " mustemlike" döletlik munasiwitini tereqqi qildurushtin yiraq turushqa chaqirdi. Xitay özining xam eshyagha bolghan éhtiyajini qamdash meqsitide afriqa ellirige meblegh sélish we xitay mallirini tökme qilip sétishni kücheytmekte idi.

Gana soda ministiri alan kyérématén aldinqi küni muxbirlargha " biz xitayning pilanliq yaki pilansiz halda afriqa tebi'iy bayliqini xitay sana'itini béqish meqsitide sümürüshidin hezer eylishimiz kérek" deydu.

Alan kyérématén, xitaylarning afriqa bazirini purset dep biliwatqanliqini, afriqiningmu xitay bazirini purset dep bilip uning satidighan tawari bolushi kéreklikini tekitligen. U, " eger biz asiyaning mustemlike dölitige aylinish arqiliq bu paydigha érishmekchi bolsaq, bu bizge payda élip kelmeydu. Chünki xitayning afriqa xam eshyalirigha érishish üchün tölewatqan bedili bashqilarni qorqutmaqta " dep körsetti.

Xitay xelq'ara jem'iyet teripidin afriqidiki urush qiliwatqan guruhlargha qoral ‏- yaraqlar sétish, pul yardem qilsa insanperwerlik sherti belgilimeslik shundaqla afriqa igilikini tereqqi qilduridighan sahelerge meblegh sélish emes, xam eshya achidighan sahelerge meblegh sélish bilen eyiblenmekte. Gana burun en'gliyining mustemlikisi bolup, u yéqindila téxi musteqilliqqe érishkenlikining 50 yilliqini xatirilidi. (Erkin)