Amérika xitayni sudan'gha bésim ishlitishke chaqirdi


2006.09.18
Share on WhatsApp
Share on WhatsApp

Amérika tashqi ishlar ministiri kondiliza rayis düshenbe küni xitaydin tesir küchini ishlitip, sudanning darfur rayonigha b d t qisimlirini orunlashturush mesiliside xartum hökümitige bésish ishlitishni telep qilghan.

Rayis bu sözlerni b d t omumi yighinigha qatnishiwatqan xitay tashqi ishlar ministiri li jawshing bilen uchrashqanda tekitligen bolup, darfur mesilisi b d t omumi qurultiyining bu heptilik yighinida muzakire qilinidighan eng muhim téma.

Amérika tashqi ishlar ministirliki bayanatchisi sén mékkormakning eskertishiche,"rayis xitaydin barliq amallarni ishlitip xelq'ara qisimlarni orunlashturush mesiliside sudanni qayil qilishqa ündigen." Li jawshing, bu hepte sudan prézidénti ömer hasan el - beshir bilen nyu - yorkta körüshkende bu mesilini otturigha qoymaqchiken. Mékkormak,"li jawshing sudanning b d t xewpsizlik kéngishi qararini ijra qilishqa qayil qilish üchün heriket qilidighanliqini bildürdi," deydu.

Xitay sudanning eng chong néfit xéridari bolupla qalmay, sudanni qoral - yaraq bilen teminleydighan muhim dölet. U, 8- ayda rusiye we qatar bilen birge xewpsizlik kéngishining darfurgha xelq'ara qisimlarni mejburi orunlashturush qararini ret qilghan. Darfurdiki afriqa ittipaqi qisimlirining waqti 30 - séntebirde toshidu. Gherb we bezi afriqa rehberliri sudanning darfurgha b d t qisimlirini orunlashturushqa maqul bolushini telep qilmaqta. (Erkin)

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.