Хитай, америка әлчиханисини исламий күчләрниң һуҗум қилиш еһтималлиқи билән агаһландурди

Америкиниң беҗиңда турушлуқ баш әлчиханисиниң чаршәнбә күни билдүрүшичә, хитай сақчи даирилири америка әлчиханисини агаһландуруп, ислам радикалчилириниң келәр һәптиниң ичидә, хитайниң 4 вә 5 юлтузлуқ меһманханилириға һуҗум қилишни пиланлаватқан болуши мумкинликини тәкитләп, әлчиханидин америка пуқралириниң һушярлиқини юқири көтүрүшкә агаһландуришини тәләп қилған.

Бу хәвәрни америка әлчиханиси өзлириниң тор бетигә елан қилған болуп, хитай даирилири һәтта әлчиханиға капаләт берип, уларниң мувапиқ бихәтәрлик тәдбирлирини қоллинидиғанлиқини һәмдә бу террорлуқ тәһдит үстидин тәл-төкүс тәкшүрүш елип баридиғанлиқини билдүргән.

Әмма бу хәвәр хитайниң һечқайси мәтбуат вастилирида елан қилинмиған. Хитайниң бу агаһландуруши, америка президенти җорҗ в бушниң хитайға қилидиған зияритидин 10 күн бурун чиқирилған. Лекин хитай даирилири бу исламий күчләрниң зади кимлики вә буниң дөләт ичидики яки чәтәлдики күч икәнлики тоғрисида тәпсилий мәлумат бәрмигән. (Пәридә)