Нйо-йоркта "әйдиз кесили" дегән темида қурултай ечилди

Бирләшкән дөләтләр тәшкилатниң баш катиби кофи аннан, пүтүн дунядики һәр қайси дөләтләргә чақириқ елан қилип, бу дөләтләрдин күндин - күнгә әвҗ еливатқан әйдиз вирусиниң тарқилишини пүтүн күчини сәрп қилип һәл қилишни тәләп қилди.

Америка бирләшмә агентлиқиниң пәйшәнбә күнидики хәвиригә қариғанда, кофи аннан ню-йорк шәһиридә чаршәнбә күнидин башлап үч күн давамлишидиған "әйдиз кесили" намлиқ қурултайниң ечилиш мурасимида сөз қилип, һәр қайси дөләт һөкүмәтлириниң җәмийәтниң қараңғу булуң – пушқақлири, болупму паһишилик билән шуғулланғучилар, зәһәрлик чекимлик чәккүчиләр вә охшаш җинислиқ мунасивити билән шуғулланғучилар көп җайлашқан йәрләрдә тәкшүрүш елип беришни күчәйтиш керәкликини оттуриға қойди.

Америка 2001 ‏- йилидин етибарән "әйдизни әң асан юқтурвалидиған кишиләр топи" ға юқирида тилға елинған кишиләрниң киридиғанлиқини ениқ билдүрүп, бу кишиләрни өзлиридә әйдиз вируси байқалса дәрһал мәлум қилишқа риғбәтләндүрүшни тәшәббүс қилған иди.

Әмма , ислам дөләтлиирниң қаришичә, " әйдизни әң асан юқтурвалидиған кишиләр топи" дин өзлирини ашкарилашни тәләп қилиш уларниң һәрикәтлирини қобул қилғанлиқ һесаблинидикән.

Кофи аннан, бу қетимқи қурултайда өзиниң әйдиз икәнликини очуқ ашкарилап сөзгә чиққан җәнубий африқилиқ маваса ханимни тунҗи қетим дадиллиқ билән өзини мәлум қилған әйдиз бимари дәп тәқдирлиди.

Һәммигә мәлум болғинидәк әйдиз кесили , нөвәттә тез сүрәттә тарқиливатқан сақийиш нисбити йоқ дийәрлик бир хил қорқунчлиқ кесәл болуп, тәкшүрүш нәтиҗисидин ашкарилинишичә, хитай әйдиз кесилигә гириптар болғанлар сани әң көп дөләтләрдин бири һесаблинип, буниңда уйғурлар көп санни игиләйду. (Әқидә)