Хитайдики даңлиқ әйдиз паалийәтчиси вән йәнхәй йоқап кәтти


2006.11.26

Бейҗиңдики мәлум әйдизгә қарши паалийәт елип бериватқан тәшкилатниң ашкарлишичә, хитайдики актип әйдиз паалийәтчилириниң бири болған вән йәнхәй җүмә күни сақчилар тәрипидин бир күн сораққа тартилғандин кейин йоқап кәткән.

Бейҗиңдики әйдиз учур мәркизи шәнбә күнигичә вәнниң хәвирини алалмиғанлиқтин учур васитилиригә мәлумат бәргән. Америка авази радиосиниң бу һәқтә бәргән хәвиридә көрситишичә, вән йәнхәй йоқап кетиштин илгири, әйдиз тәтқиқат мәркизидики хизмәтдашлириға һәмдә әйдиз учур мәркизигә -26 ноябир йәкшәнбә өткүзмәкчи болған йиғинни бикар қилишни ейтқан.

Әйдиз паалийәтчиси вән йәнхәй хитай һөкүмитиниң әйдизни конторл қилишқа әһмийәт бәрмәйватқанлиқини изчил тәнқид қилип келиватқачқа хитай һөкүмитиниң агаһландуришиға учрап кәлгән. Вән йәнхәйниң йоқап кетиши, 1 - декабир дуня әйдиз күни һарписида йүз бәрди.

Хитайда әйдиз мәсилисиниң еғирлишиға әгишип әйдизгә қарши аммиви паалийәт елип бериватқан тәшкилатлар көпәймәктә шундақла улар давамлиқ һөкүмәтниң қаттиқ тосқунлиқиға учрап кәлмәктә.

Өткән айда уйғур елидики қар ләйлиси намидики бир әйдиз тәшкилатиму хитай һөкүмити тәрипидин тақалған иди. Мәзкур тәшкилатниң мәсулиниң қәйәрдилики һазирғичә мәлум әмәс. (Гүлчеһрә)

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.