Xitaydiki dangliq eydiz pa'aliyetchisi wen yenxey yoqap ketti

Béyjingdiki melum eydizge qarshi pa'aliyet élip bériwatqan teshkilatning ashkarlishiche, xitaydiki aktip eydiz pa'aliyetchilirining biri bolghan wen yenxey jüme küni saqchilar teripidin bir kün soraqqa tartilghandin kéyin yoqap ketken.

Béyjingdiki eydiz uchur merkizi shenbe künigiche wenning xewirini alalmighanliqtin uchur wasitilirige melumat bergen. Amérika awazi radi'osining bu heqte bergen xewiride körsitishiche, wen yenxey yoqap kétishtin ilgiri, eydiz tetqiqat merkizidiki xizmetdashlirigha hemde eydiz uchur merkizige -26 noyabir yekshenbe ötküzmekchi bolghan yighinni bikar qilishni éytqan.

Eydiz pa'aliyetchisi wen yenxey xitay hökümitining eydizni kontorl qilishqa ehmiyet bermeywatqanliqini izchil tenqid qilip kéliwatqachqa xitay hökümitining agahlandurishigha uchrap kelgen. Wen yenxeyning yoqap kétishi, 1 - dékabir dunya eydiz küni harpisida yüz berdi.

Xitayda eydiz mesilisining éghirlishigha egiship eydizge qarshi ammiwi pa'aliyet élip bériwatqan teshkilatlar köpeymekte shundaqla ular dawamliq hökümetning qattiq tosqunliqigha uchrap kelmekte.

Ötken ayda Uyghur élidiki qar leylisi namidiki bir eydiz teshkilatimu xitay hökümiti teripidin taqalghan idi. Mezkur teshkilatning mes'ulining qeyerdiliki hazirghiche melum emes. (Gülchéhre)