Америка кишиик һоқуқ кеңишигә әза болмаслиқни қарар қилди


2006.04.06

Америка һөкүмити, бирләшкән дөләтләр тәшкилати кишилик һоқуқ көмитети орниға қурулған бирләшкән дөләтләр тәшкилати кишилик һоқуқ кеңишигә әза болуп кирмәсликни қарар қилған.

Америка һөкүмәт хадимлири 6 ‏- април күни вашингтонда бәргән баянатида: “ америка йеңи қурулған кишилик һоқуқ кеңишиниң қандақ бир шәкил алидиғанлиқини вә қайси йөнүлүшкә қарап маңидиғанлиқини күтүшни қарар қилди” деди.

Бирләшкән дөләтләр тәшкилати өткән ай мәзкур кеңәшниң қурулушини әза дөләтләрниң мутләқ көпчиликиниң авази билән қобул қилди. Америка һөкүмити бу кеңәшкә кишилик һоқуқни дәпсәндә қилидиған дөләтләрниң кирип қилишиниң алдини елиш үчүн, униң низамнамисиға түзитиш киргүзүшни тәләп қилған. Лекин башқа дөләтләр кеңәшниң низамнамисиға түзитиш киргүзүш үчүн вақит керәкликини билдүрүп америкиниң тәлипини рәт қилди. Униң үчүн америка кишилик һоқуқ кеңишиниң қурулушиға қарши аваз бәргән иди.

Хәвәрләргә қариғанда, 21 дөләт б д т кишилик һоқуқ кеңишигә әза болуш үчүн өзлирини намзат көрсәткән. Америка бирләшмә агентлиқиниң хәвәр қилишичә, б д т кишилик һоқуқ кеңиши өзиниң тунҗи йеғинини 6‏- айниң 19 ‏- күни җәнвәдә ачидикән.

Бирләшкән дөләтләр тәшкилати кишилик һоқуқ комитетиға , хитай, содан , ливийә қатарлиқ кишилик һоқуқни әң көп дәпсәндә қиливатқан дөләтләр әза болувалғанлиқи үчүн, бу комитет өзиниң итибарини пүтүнләй йоқатқан иди. Шуңа бирләшкән дөләтләр тәшкилати әза дөләтләрниң көпчиликиниң тәлипигә асасән мәзкур комитетни бикар қилип, униң орниға кишилик һоқуқ кеңишини қуруп чиққан. (Әқидә)

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.