Amérika kishi'ik hoquq kéngishige eza bolmasliqni qarar qildi


2006.04.06

Amérika hökümiti, birleshken döletler teshkilati kishilik hoquq kömitéti ornigha qurulghan birleshken döletler teshkilati kishilik hoquq kéngishige eza bolup kirmeslikni qarar qilghan.

Amérika hökümet xadimliri 6 ‏- april küni washin'gtonda bergen bayanatida: “ Amérika yéngi qurulghan kishilik hoquq kéngishining qandaq bir shekil alidighanliqini we qaysi yönülüshke qarap mangidighanliqini kütüshni qarar qildi” dédi.

Birleshken döletler teshkilati ötken ay mezkur kéngeshning qurulushini eza döletlerning mutleq köpchilikining awazi bilen qobul qildi. Amérika hökümiti bu kéngeshke kishilik hoquqni depsende qilidighan döletlerning kirip qilishining aldini élish üchün, uning nizamnamisigha tüzitish kirgüzüshni telep qilghan. Lékin bashqa döletler kéngeshning nizamnamisigha tüzitish kirgüzüsh üchün waqit kéreklikini bildürüp amérikining telipini ret qildi. Uning üchün amérika kishilik hoquq kéngishining qurulushigha qarshi awaz bergen idi.

Xewerlerge qarighanda, 21 dölet b d t kishilik hoquq kéngishige eza bolush üchün özlirini namzat körsetken. Amérika birleshme agéntliqining xewer qilishiche, b d t kishilik hoquq kéngishi özining tunji yéghinini 6‏- ayning 19 ‏- küni jenwede achidiken.

Birleshken döletler teshkilati kishilik hoquq komitétigha , xitay, sodan , liwiye qatarliq kishilik hoquqni eng köp depsende qiliwatqan döletler eza boluwalghanliqi üchün, bu komitét özining itibarini pütünley yoqatqan idi. Shunga birleshken döletler teshkilati eza döletlerning köpchilikining telipige asasen mezkur komitétni bikar qilip, uning ornigha kishilik hoquq kéngishini qurup chiqqan. (Eqide)

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.