Prézidént bush hindistan bilen istratégiyilik shériklik munasiwiti ornatqanliqini jakarlidi

Amérika prézidénti jorji bush hindistandiki ikki künlik ziyariti jeryanida yéngi déhli bilen yadro énérgiye hemkarliq kélishimi imzalighandin kéyin, hindistan bilen istratégiyilik shériklik munasiwiti ornatqanliqini jakarlidi.

Bush, hindistanning yuqiri téxnika rayoni heyder'abadni ziyaret qilghanda yadro kélishimini " nahayiti muhim kélishim, dep körsetti. U, shu yerdiki bir soda mektipining oqughuchilirigha söz qilghanda, " bizning istratégiyilik shériklik munasiwitimiz méni hayajan'gha saldi" deydu.

Bush heyder'abadni ziyaret qilghanda musulmanlar nechche ming kishilik namayish ötküzdi. Namayishchilar usama bin ladénning süritini kötüriwalghan. Laknawa shehiridiki namayishta musulmanlar bilen hindi dinidikiler otturisida toqunush yüz bérip, az dégende 3 adem öldi, 17 adem yarilandi .

Prézidént bush hindistan ziyaritini axirlashturushtin burun yéngi déhlidiki purana chila tarixiy qel'eside hindistan xelqighe sözqilip, "hindistan amérikining 21 - esirdiki teb'iy ittipaqdishi, chünki biz insaniyetning erkinliki mesiliside qérindash " dep tekitlidi.

Bushning ziyariti jüme küni axirlashqandin kéyin, u shu küni pakistan paytexti islam'abad shehirige yétip barghan. Amérika prézidéntining eskertishiche, u pakistanda islam'abad da'iriliri bilen térrorchiliqqa qarshi turush hemkarliqi, amérika - pakistan siyasi - iqtisadi munasiwetliri boyiche muzakire élip baridiken. (Erkin)