ئامېرىكا ئىران ئەتراپىدىكى دېڭىز رايونىدا كەڭ كۆلەمدە ھەربىي مانېۋىر ئۆتكۈزدى


2007-05-27
Share

ئامېرىكا دېڭىز ئارمىيىسى يەكشەنبە كۈنى پارىس قولتۇقىنىڭ ئىران بىلەن چېگرىلىنىدىغان دېڭىز رايونىدا كەڭ كۆلەمدە ھەربىي مانېۋىر ئۆتكۈزگەن بولۇپ، بۇ ئامېرىكىنىڭ يېقىنقى بىر قانچە يىللاردىن بۇيان مەزكۇر رايوندا ئېلىپ بارغان ئەڭ چوڭ مانېۋىرى بولۇپ ھېسابلىنىدىكەن.

غەرب ئاگېنتلىقلىرىنىڭ خەۋەر قىلىشىچە، ئامېرىكا مەزكۇر مانېۋىردا ئاۋىئاماتكىنى ئۆز ئىچىگە ئالغان 9 دانە پاراخوت، 140 دانە كۈرەشچى ئايروپىلان ئىشقا سالغان شۇنىڭدەك ئۇنىڭغا 17 مىڭ نەپەر ئەتراپىدا ھەربىي خادىم قاتناشتۇرغان.

ئامېرىكا ئىراق ئۇرۇشى باشلانغاندىن بۇيان پارىس قولتۇقى ئەتراپىدىكى ھەربىي كۈچىنى ۋە رايوندىكى تەسىرىنى ئىزچىل ئاشۇرۇپ كەلگەن بولۇپ، يېقىندىن بۇيان ئىراننىڭ يادرو پىلانىدىن كېلىپ چىققان ئىختىلاپلار تۈپەيلىدىن ئامېرىكا –ئىران مۇناسىۋەتلىرى جىددىيلىشىپ قالغان ئىدى. ئىران تەرەپ ئامېرىكا، گېرمانىيە، فرانسىيە قاتارلىق دۆلەتلەرنىڭ ئۇران تاۋلاشنى توختىتىش تەلىپىنى ئىزچىل رەت قىلىپ كەلگەن ئىدى.

ئامېرىكا ھەربىي دائىرىلىرى بۇ قېتىمقى مانېۋىر ھەققىدە توختىلىپ، ئۇنىڭ ھېچ قانداق بىر دۆلەتكە قارىتىلمايدىغانلىقى، پەقەت ئەسكەرلەرنى مەشىق قىلدۇرۇشنىلا مەقسەت قىلىدىغانلىقىنى ئەسكەرتكەن.

ئىران تەرەپ بولسا، بۇنىڭ ئامېرىكىنىڭ ئۆز ئەسكەرلىرىنىڭ روھىنى ئۆستۈرۈشنى مەقسەت قىلىدىغانلىقىنى بىلدۈرگەن.

يېقىندا ئامېرىكا بىلەن ئىران دائىرىلىرى ئىككى دۆلەتنىڭ يېقىنقى بىر قانچە ھەپتە ئىچىدە باغدادتا ئىراق مەسىلىسى بويىچە سۆھبەت ئۆتكۈزىدىغانلىقىنى ئېلان قىلغان ئىدى. (ئۈمىدۋار)

پىكىرلەر (0)

بارلىق پىكىر - بايانلارنى كۆرۈش.

پىكىر قوشۇڭ

رادىئونىڭ ئىشلىتىش شەرتلىرىگە ئاساسەن، پىكىرلىرىڭىز تەكشۈرگۈچىلەر تەرىپىدىن تەستىقلىنىشى ۋە مۇۋاپىق دەرىجىدە تەھرىرلىنىشى تۈپەيلى، تور بەتتە دەرھال پەيدا بولمايدۇ. سىز قالدۇرغان مەزمۇنغا ئەركىن ئاسىيا رادىئوسى جاۋابكار بولمايدۇ. باشقىلارنىڭ كۆز قارىشى ۋە ھەقىقەتكە ھۆرمەت قىلىشىڭىزنى سورايمىز.

تولۇق بەت