Америка иран әтрапидики деңиз районида кәң көләмдә һәрбий маневир өткүзди


2007.05.27

Америка деңиз армийиси йәкшәнбә күни парис қолтуқиниң иран билән чегрилинидиған деңиз районида кәң көләмдә һәрбий маневир өткүзгән болуп, бу америкиниң йеқинқи бир қанчә йиллардин буян мәзкур районда елип барған әң чоң маневири болуп һесаблинидикән.

Ғәрб агентлиқлириниң хәвәр қилишичә, америка мәзкур маневирда авиаматкини өз ичигә алған 9 данә парахот, 140 данә күрәшчи айропилан ишқа салған шуниңдәк униңға 17 миң нәпәр әтрапида һәрбий хадим қатнаштурған.

Америка ирақ уруши башланғандин буян парис қолтуқи әтрапидики һәрбий күчини вә райондики тәсирини изчил ашуруп кәлгән болуп, йеқиндин буян иранниң ядро пиланидин келип чиққан ихтилаплар түпәйлидин америка –иран мунасивәтлири җиддийлишип қалған иди. Иран тәрәп америка, германийә, франсийә қатарлиқ дөләтләрниң уран тавлашни тохтитиш тәлипини изчил рәт қилип кәлгән иди.

Америка һәрбий даирилири бу қетимқи маневир һәққидә тохтилип, униң һеч қандақ бир дөләткә қаритилмайдиғанлиқи, пәқәт әскәрләрни мәшиқ қилдурушнила мәқсәт қилидиғанлиқини әскәрткән.

Иран тәрәп болса, буниң америкиниң өз әскәрлириниң роһини өстүрүшни мәқсәт қилидиғанлиқини билдүргән.

Йеқинда америка билән иран даирилири икки дөләтниң йеқинқи бир қанчә һәптә ичидә бағдадта ирақ мәсилиси бойичә сөһбәт өткүзидиғанлиқини елан қилған иди. (Үмидвар)

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.