دونالد رامسفىلد ئىراقنى زىيارەت قىلدى


2004-12-24
Share

ئامېرىكا دۆلەت مۇداپىئە مىنىستىرى دونالد رامسفىلد، خرىستىئانلارنىڭ روژىستۋا بايرىمى ھارپىسى ئىراقنى تۇيۇقسىز زىيارەت قىلىپ، ئىراقتىكى ئامېرىكا قىسىملىرىنى يوقلىدى. ئۇ جۈمە كۈنى ئامېرىكا ئارمىيىسىنىڭ موسۇلدىكى قىسىملىرىنى كۆزدىن كەچۈردى. شۇنداقلا تۆت كۈننىڭ ئالدىدا بۇ يەردە يۈز بەرگەن پارتلاش ۋەقەسىدە يارىلانغان ئەسكەرلەردىن ھال سورىدى.

تۆت كۈننىڭ ئالدىدا موسۇلدىكى ئامېرىكا قىسىملىرىنىڭ بازىسىدا پارتلاش يۈز بېرىپ، 22 ئادەم ئۆلگەن. ئامېرىكا ھەربىي دائىرىلىرى، پارتلاش ۋەقەسى ئۆزىنى ئۆلتۈرۋېلىش خاراكتېرلىك ھۇجۇم بولۇشى مۇمكىن، دەپ جاكارلىدى. بۇ ۋەقە ئۆتكەن يىلى 4 - ئايدا ئامېرىكا باشچىلىقىدىكى ئىتتىپاقداش كۈچلەر ئىراققا ھۇجۇم قىلغاندىن بېرى، ئامېرىكا قىسىملىرى ئۇچرىغان ئەڭ چوڭ يوقىتىش بولغان.

بۇنىڭدىن ئىلگىرى رامسفىلد، ئىراقتا ئۆلگەن ئامېرىكا ئەسكەرلىرىنىڭ ئائىلە تاۋاباتىغا يازغان ھال سوراش خېتىنى ئۆزىنىڭ ئىمزالىمىغانلىقى، شۇنداقلا كۇۋەيتنى زىيارەت قىلغاندا بۇ يەردىكى ئامېرىكا ئەسكەرلىرىنى ئازارلاش بىلەن تەنقىت قىلىنغان. ئامېرىكا دۆلەت مەجلىسىنىڭ بەزى ئەزالىرى رامسفىلدنى ئىستىپا بېرىشكە چاقىرغان ئىدى.

رامسفىلد، ئامېرىكا ئەسكەرلىرىگە ئۇلارنىڭ ئىراقتىكى ۋەزىپىسى پەۋقۇللادە مۇھىملىقىنى تەكىتلىدى. ئەسكەرلەرنىڭ روژىستۋا بايرىمىنى تەبرىكلىگەن رامسفىلد، قوراللىق ئۇنسۇرلار ئۈستىدىن غەلىبە قىلىش ئىشەنچىسىنىڭ كامىللىقىنى ئىلگىرى سۈردى. رامسفىلد، شۇ كۈنى تىكرىت، كەربالا قاتارلىق جايلاردىكى ئامېرىكا ئەسكەرلىرىنى كۆزدىن كەچۈرگەن. (ئەركىن)

پىكىرلەر (0)

بارلىق پىكىر - بايانلارنى كۆرۈش.

پىكىر قوشۇڭ

رادىئونىڭ ئىشلىتىش شەرتلىرىگە ئاساسەن، پىكىرلىرىڭىز تەكشۈرگۈچىلەر تەرىپىدىن تەستىقلىنىشى ۋە مۇۋاپىق دەرىجىدە تەھرىرلىنىشى تۈپەيلى، تور بەتتە دەرھال پەيدا بولمايدۇ. سىز قالدۇرغان مەزمۇنغا ئەركىن ئاسىيا رادىئوسى جاۋابكار بولمايدۇ. باشقىلارنىڭ كۆز قارىشى ۋە ھەقىقەتكە ھۆرمەت قىلىشىڭىزنى سورايمىز.

تولۇق بەت