Amérikining yéngi mudapi'e ministiri robrt geyts iraqni ziyaret qildi

Birleshme agéntliqining 20 ‏- dékabir küni iraqtin xewer qilishiche, amérikining yéngi dölet mudapi'e ministiri robrt geyts düshenbe küni besh burjek binada wezipe öteshke bashlap ikki kündin kéyin iraqni ziyaret qilghan. U wezipe öteshtin burun, iraq urushini köp uchrimaydighan urush, qalaymiqanchiliq urushi, bu urushta amérika téxi ghelibe qilmidi, herbiy komandirlardin köprek meslihet élish kérek, dep qaraytti. Prézidént jorji bushmu uni wezipige teyinleshte iraq urushining yéngi istratégiyisini tüzüp chiqishqa yardemlishidu, dégen ümidte bolghan idi. Bügün geyts ependi iraq ziyariti jeryanida amérika qisimlirining sanini köpeytishni teshebbus qilghan.

Birleshme agéntliqining washin'gtondin xewer qilishiche, amérikining yéngi mudapi'e ministiri robrt geyts iraqni ziyaret qilishqa bashlighandin kéyin, prézidént bush iraq urushida amérika téxi ghelibe qilmighanliqini tunji qétim étirap qilghan. U sözide yene "emma biz meghlup bolmiduq, biz choqum ghelibe qilimiz" dégen. Xewerde éytilishiche, jorji bushning ghelibe qilish ölchimi ‏-‏- iraqta mukemmel démokratik tüzüm tikleshtin ibaret. Hazir iraqta 140 ming amérika eskiri bar. (Weli)