Конзилиза райис оттура шәрқни зиярәт қилмақчи


2006.07.21

Исраилийә күрәшчи айрупиланлири җүмәкүни ливандики нишанларни давамлиқ бомбардиман қилди. Шуниң билән биргә даириләр җәнубий ливандики пуқраларни бу райондин дәрһал айрилиш тоғрисида агаһландурмақта. Америка ташқий ишлар министири кондилиза райис келәр һәптә оттура шәрқни зиярәт қилмақчи.

Исраилийә армийисиниң юқири дәриҗилик бир офетсири, исраилийиниң һизбулла һәрикитигә қарши җәнуби ливанда қозғиған һәрбий һуҗуми кәлгүси бир қанчә күн ичидә техиму күчийидиғанлиқини агаһландурған. У исраилийә запас қисимлирини вәзипигә чақирди. Америка ташқий ишлар министири кондилиза райис, кризисни һәл қилиш чариси үстидә издиниш үчүн йәкшәнбә күни оттура шәрққә сәпәр қилидиғанлиқини җакарлиди. Лекин у, тәрәпләрни районниң тоқунуштин бурунқи тиркишиш һалитини әслигә кәлтүридиған, дәрһал уруш тохтитиш келишими имзалашқа қистимайдикән.

Һазирғичә исраилийиниң һава һуҗумида өлгән ливанлиқларниң сани 300 дин ашқан. Һизбулланиң бомбардиманида өлгән исраийилик сани 30 ға йәтти. Һизбулла җүмә күни исраилийиниң һайфа шәһиригә йәнә ракита атти. Исраилийә қошунлири ливан чегриси ичидә һизбулла җәңчилири билән тоқунушмақта.

Бу арида б д т кишилик һоқуқ кеңишиниң комисари луис арбор, урушиватқан тәрәпләрни ливан, исраилийә вә газада уруш җинайити садир қилмаслиққа агаһландурди. У, юқириқи дөләт вә районларда "уруш җинайити садир қилиниш мумкинчилики мәвҗут " дәйду. Луис арбор, тәрәпләрни "нисбилик принсипи" ға һөрмәт қилишқа чақирди. (Әркин)

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.