Konziliza rayis ottura sherqni ziyaret qilmaqchi

Isra'iliye küreshchi ayrupilanliri jümeküni liwandiki nishanlarni dawamliq bombardiman qildi. Shuning bilen birge da'iriler jenubiy liwandiki puqralarni bu rayondin derhal ayrilish toghrisida agahlandurmaqta. Amérika tashqiy ishlar ministiri kondiliza rayis kéler hepte ottura sherqni ziyaret qilmaqchi.

Isra'iliye armiyisining yuqiri derijilik bir ofétsiri, isra'iliyining hizbulla herikitige qarshi jenubi liwanda qozghighan herbiy hujumi kelgüsi bir qanche kün ichide téximu küchiyidighanliqini agahlandurghan. U isra'iliye zapas qisimlirini wezipige chaqirdi. Amérika tashqiy ishlar ministiri kondiliza rayis, krizisni hel qilish charisi üstide izdinish üchün yekshenbe küni ottura sherqqe seper qilidighanliqini jakarlidi. Lékin u, tereplerni rayonning toqunushtin burunqi tirkishish halitini eslige keltüridighan, derhal urush toxtitish kélishimi imzalashqa qistimaydiken.

Hazirghiche isra'iliyining hawa hujumida ölgen liwanliqlarning sani 300 din ashqan. Hizbullaning bombardimanida ölgen isra'iyilik sani 30 gha yetti. Hizbulla jüme küni isra'iliyining hayfa shehirige yene rakita atti. Isra'iliye qoshunliri liwan chégrisi ichide hizbulla jengchiliri bilen toqunushmaqta.

Bu arida b d t kishilik hoquq kéngishining komisari lu'is arbor, urushiwatqan tereplerni liwan, isra'iliye we gazada urush jinayiti sadir qilmasliqqa agahlandurdi. U, yuqiriqi dölet we rayonlarda "urush jinayiti sadir qilinish mumkinchiliki mewjut " deydu. Lu'is arbor, tereplerni "nisbilik prinsipi" gha hörmet qilishqa chaqirdi. (Erkin)