Америка билән қирғизистан һәрбий базиниң иҗарә мәсилисидә келишим һасил қилди

Америкиниң қирғизистан әлчиханиси вә қирғизистан даирилириниң җүмә күни ашкарилишичә, америка билән қирғизистан бу дөләттики америка һәрбий базисиниң иҗарә һәққи мәсилисидә келишим һасил қилған.

Қирғизистан вә америка әмәлдарлири имзалиған келишим бойичә америка " қирғизистан һөкүмити вә қирғиз содигәрлири тәминлигән мәһсулат вә мулазимәткә чушлуқ һәқ төләйдиған вә қирғизистан америкиниң һәрикитини қоллайдиған болған."

Қирғизистан дөләт хәвпсизлик комитетиниң секритари мираслов ниязов бирләшмә ахбарат агентлиқиға " америка базиси қирғизистанда қалиду. Биз америка билән узун мәзгиллик истратегийилик һәмкарлиқ елип беришқа қошулдуқ" диди. Лекин ниязов америкиниң қирғизистанға қанчилик пул беришкә мақул болғанлиқини ашкарилимиди.

Америка қирғизистанға бу йил вә келәр йил ичидә 150 милйон доллар беришкә мақул болған. Лекин буни америка дөләт мәҗлисиниң тәстиқлишидин өткүзүшкә тоғра келиду. Америка, қирғизистанға 1991 - йили мустәқил болғандин таки һазирғичә җәмий 850 милйон доллар ярдәм қилған.

Бешкәк һөкүмити манас айдуруминиң иҗарә һәққи үчүн америкидин 200 милйон доллар иҗарә һәққи тәләп қилип кәлмәктә вә президент қурманбек бақийев , әгәр америка бу пулни бәрмисә, америкидин қошунлирини елип чиқип кетишни тәләп қилимиз, дәп тәһдит салмақта иди. Бу келишим қирғизистан йеқинда 2 америка дипломатини қирғизистандин қоғлап чиқарған әһвал астида имзаланди. (Әркин)