Amérika bilen qirghizistan herbiy bazining ijare mesiliside kélishim hasil qildi

Amérikining qirghizistan elchixanisi we qirghizistan da'irilirining jüme küni ashkarilishiche, amérika bilen qirghizistan bu dölettiki amérika herbiy bazisining ijare heqqi mesiliside kélishim hasil qilghan.

Qirghizistan we amérika emeldarliri imzalighan kélishim boyiche amérika " qirghizistan hökümiti we qirghiz sodigerliri teminligen mehsulat we mulazimetke chushluq heq töleydighan we qirghizistan amérikining herikitini qollaydighan bolghan."

Qirghizistan dölet xewpsizlik komitétining sékritari miraslow niyazow birleshme axbarat agéntliqigha " amérika bazisi qirghizistanda qalidu. Biz amérika bilen uzun mezgillik istratégiyilik hemkarliq élip bérishqa qoshulduq" didi. Lékin niyazow amérikining qirghizistan'gha qanchilik pul bérishke maqul bolghanliqini ashkarilimidi.

Amérika qirghizistan'gha bu yil we kéler yil ichide 150 milyon dollar bérishke maqul bolghan. Lékin buni amérika dölet mejlisining testiqlishidin ötküzüshke toghra kélidu. Amérika, qirghizistan'gha 1991 - yili musteqil bolghandin taki hazirghiche jem'iy 850 milyon dollar yardem qilghan.

Béshkek hökümiti manas aydurumining ijare heqqi üchün amérikidin 200 milyon dollar ijare heqqi telep qilip kelmekte we prézidént qurmanbék baqiyéw , eger amérika bu pulni bermise, amérikidin qoshunlirini élip chiqip kétishni telep qilimiz, dep tehdit salmaqta idi. Bu kélishim qirghizistan yéqinda 2 amérika diplomatini qirghizistandin qoghlap chiqarghan ehwal astida imzalandi. (Erkin)

Buni bésish arqiliq, pikringizni yézing

• Print
• Hembehr
• Ewetish

Barliq pikir - bayanlarni körüsh.

• Bügünki anglitish
• Ilgiriki anglitishlar