Qirghizistan amérika qisimlirini qoghlap chiqiridighanliqi heqqide tehdit saldi

Bir qirghiz puqrasining qirghizistandiki amérika herbiy xadimliri teripidin étip tashlinish weqesidin kéyin, qirghizistan da'iriliri jüme küni amérikigha bu dölettiki amérika eskerlirini qoghlap chiqiridighanliqi heqqide tehdit saldi.

Qirghizistan - amérika munasiwetliri 6 - dékabir küni manas hawa armiye bazisini qoghdawatqan bir amérika bixeterlik xadimi, yéqilghu toshuydighan bir qirghiz shopurni étip tashlighandin kéyin soghuqlishishqa bashlighan idi. Amérika qisimliri amérika bixeterlik xadimining "tehditke qarshi oq chiqarghanliqini" bildürmekte. Da'irilerning eskertishiche, qirghiz shopur amérika eskirige pichaq bilen tehdit salghan.

Qirghizistan parlaménti jüme küni bir qarar layihisi maqullap, hökümettin amérika bilen 2001 - yili imzalan'ghan manas ayrodromini ijarige bérish kélishimini we qirghizistan jumhuriyiti zéminini ijarige bérishning toghra yaki toghra emeslikini qayta közdin kechürüshni telep qildi. Qarar layihiside " qirghiz xelqi hawa armiye bazisida yüz bergen weqedin endishe qilipla qalmay, belki amérika terepning tekshürüshke tosalghuluq qiliwatqanliqi we bezide qirghiz terepning teleplirige sel qarawatqanliqidin jiddiy endishe qilmaqta" déyilgen.

Nöwette qirghizistandiki hawa armiye bazisida 1000 dek amérika eskiri wezipe ötimekte. Bu bazining ijare heqqi qirghizistanning muhim maliye kirimi bolup qalghan. Shangxey guruhidiki döletler, bolupmu rusiye bilen xitay amérikining bu yerdiki herbiy qisimlirini élip chiqip kétishini ündimekte idi. (Erkin)