Җорҗ буш, виладемир путин билән русийидики димократийә мәсилисини музакирә қилди


2005.02.24

Америка президенти җорҗ буш пәйшәнбә күни силовакийидә русийә президенти виладемир путин билән сөһбәт өткүзүп, икки дөләт мунасивити вә русийидики демократийини өз ичигә алған бир қатар мәсилиләрни музакирә қилди.

Ғәрб мәтбуатлириниң хәвиригә қариғанда, җорҗ буш бу қетимқи сөһбәттин пайдилинип, русийиниң иранға ярдәмлишип, ядро електир истансиси қуруш пиланиға болған әндишисини ипадилигән.

Америка президенти җорҗ буш йәнә, русийә һөкүмитиниң юкус нефит ширкитини қайтуревелиши, мәтбуатларға болған контроллуқни күчәйткәнлики вә йәрлик әмәлдарлар сайлимини бикар қилиши қатарлиқ мәсилиләргә болған әндишисини оттуриға қоюп, киримлин сарийини демократик ислаһатни әслигә кәлтүрүшкә чақирди.

90 Минутчә давамлашқан сөһбәттин кийин, америка президенти җорҗ буш икки тәрәп сөһбитиниң интайин оңушлуқ болғанлиқини, икки дөләт рәһбири шималий корийә вә иранниң ядро қоралға игә болмаслиқи һәққидә бир пикиргә кәлгәнликини билдүргән. Русийә президенти виладемир путин болса, икки дөләт мунасивитини давамлиқ күчәйтидиғанлиқини билдүргән.

Силовакийә, җорҗ бушниң яврупа зияритиниң әң ахирқи бекити болуп һесаблиниду.

Икки дөләт рәһбәрлири сөһбәт өткүзүшниң алдида, америка ташқи ишлар министири кондилиза райис билән русийә дөләт мудапиә министири сергий иваноф, йиник типтики башқурулидиған бомбиларни контрол қилиш һәққидә келишим мақуллиған иди. (Арзу)

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.