Jorj bush, wiladémir putin bilen rusiyidiki dimokratiye mesilisini muzakire qildi


2005.02.24

Amérika prézidénti jorj bush peyshenbe küni silowakiyide rusiye prézidénti wiladémir putin bilen söhbet ötküzüp, ikki dölet munasiwiti we rusiyidiki démokratiyini öz ichige alghan bir qatar mesililerni muzakire qildi.

Gherb metbu'atlirining xewirige qarighanda, jorj bush bu qétimqi söhbettin paydilinip, rusiyining iran'gha yardemliship, yadro éléktir istansisi qurush pilanigha bolghan endishisini ipadiligen.

Amérika prézidénti jorj bush yene, rusiye hökümitining yukus néfit shirkitini qayturéwélishi, metbu'atlargha bolghan kontrolluqni kücheytkenliki we yerlik emeldarlar saylimini bikar qilishi qatarliq mesililerge bolghan endishisini otturigha qoyup, kirimlin sariyini démokratik islahatni eslige keltürüshke chaqirdi.

90 Minutche dawamlashqan söhbettin kiyin, amérika prézidénti jorj bush ikki terep söhbitining intayin ongushluq bolghanliqini, ikki dölet rehbiri shimaliy koriye we iranning yadro qoralgha ige bolmasliqi heqqide bir pikirge kelgenlikini bildürgen. Rusiye prézidénti wiladémir putin bolsa, ikki dölet munasiwitini dawamliq kücheytidighanliqini bildürgen.

Silowakiye, jorj bushning yawrupa ziyaritining eng axirqi békiti bolup hésablinidu.

Ikki dölet rehberliri söhbet ötküzüshning aldida, amérika tashqi ishlar ministiri kondiliza rayis bilen rusiye dölet mudapi'e ministiri sérgiy iwanof, yinik tiptiki bashqurulidighan bombilarni kontrol qilish heqqide kélishim maqullighan idi. (Arzu)

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.