Amérika bilen rusiye bashqurulidighan bombidin mudapi'e körüsh sistémisi mesiliside söhbet ötküzidu

Bir yildin buya amérika bilen rusiye arisidiki munasiwetlerning soghuqliship qélishidiki muhim amillarning birige aylinip qalghan amérikining sherqiy yawropada bashqurulidighan bombidin mudapi'e körüsh sistémisi ornitish pilani mesilisi heqqidiki yuqiri derijilik rehberler söhbiti kéler heptide budapéshtta ötküzülmekchi.

Amérika tashqi ishlar ministirliqining bildürüshiche, bu söhbetke amérika tereptin xelq'ara bixeterlik we herbiy hazirliqlarni kontrol qilish ishliri boyiche yardemchi tashqi ishlar ministiri jon rod, rusiye tereptin mu'awin tashqi ishlar ministiri sérgéy kisliyak qatnishidu.

Bu, ikki dölet arisidiki mezkur mesilini hel qilishni ilgiri süridighan muhim ehmiyetlik bir söhbet bolup, asasliq nuqtining amérika terep otturigha qoyghan bashqurulidighan bombidin mudapi'e körüsh sistémisi jehette rusiye bilen hemkarlishish pilanini muzakire qilishqa yeni ottura sherqtin qoyup bérilidighan bashqurulidighan bombilardin ortaq mudapi'e körüsh we uning aldini birlikte élish témilirigha qaritilishi mumkin iken.

Amérika terep polsha bilen chéx jumhuriyitining qoshulushi bilen bashqurulidighan bombidin mudapi'e körüsh sistémisini onitidighanliqini élan qilghandin kéyin, rusiye terepning qattiq qarshiliqigha uchrighan bolup, amérika bu heqte rusiyige köp chüshenche bergen bolsimu, rusiye buni yéngi soghuq munasiwetler urushi idiyisi bilen baghlighan.

Netijide prézidént bush bilen prézidént putin gérmaniyide échilghan sekkiz sana'et döliti yighini pikir birliki hasil qilghan hemde putin bu sistémini ezerbeyjan'gha ornitish teklipini bergen. Bu yil yene prézidént bush putinni öz öyige shexsiy teklip qilip, yene bu mesilini muzakire qilip, hemkarlishishqa qoshulghan idi. (Ümidwar)